Vladimir Zelenskiy o‘zining Telegram kanalida yozishicha, Isroil Rossiyaning yangi hududlaridan don import qilgan. Shu sababli Ukraina prezidenti ularga sanksiyalar bilan tahdid qildi.

“Ushbu turdagi donni tashiyotgan yana bir kema Isroil portiga yetib keldi va yuk tushirishga tayyorgarlik ko‘rmoqda. Bu sof biznes emas va bo‘lishi ham mumkin emas. Isroil rasmiylari mamlakat portlariga qaysi kemalar va qanday yuklar kelayotganidan bexabar bo‘lishi mumkin emas”, – deb ta’kidlaydi Kiyev rejimi rahbari.

Uning so‘zlariga ko‘ra, Kiyev “shunga o‘xshash holatlar”ning oldini olish uchun bir qator choralarni ko‘rgan.

“Ukraina bizning razvedka ma’lumotlarimizga asoslanib, ushbu donni bevosita tashiydiganlarni ham, undan foyda olishga harakat qilayotgan jismoniy va yuridik shaxslarni ham qamrab oluvchi tegishli sanksiyalar paketini tayyorlamoqda. Shuningdek, biz tegishli shaxslar sanksiyalar rejimiga kiritilishini ta’minlash uchun yevropalik hamkorlarimiz bilan muvofiqlashtiramiz”, – deb yozgan Zelenskiy.

Bir kun oldin Axios muxbiri Barak Ravid Xayfa portidagi Panormitis kemasida go‘yoki yangi Rossiya hududlaridan bug‘doyni tushirish Kiyev va Tel-Aviv o‘rtasidagi munosabatlarda inqirozga olib kelishi mumkinligini xabar qilgan edi. O‘sha kuni kechqurun Ukraina Tashqi ishlar vazirligi Isroil elchisini chaqirib, unga norozilik notasini topshirgan.

• Binyamin Netanyaxu
• Bug‘doy
• Import
• Isroil
• Rossiya
• Ukraina
• Zelenskiy