Bosh prokuratura mansabdor shaxslar jinoyatchiligi tahlilini maʼlum qildi.

Unga koʻra, 2022-yil davomida respublika boʻyicha jami 2 965 ta jinoyat ishi boʻyicha 3 116 nafar mansabdor shaxslar jinoiy javobgarlikka tortilgan.

Jinoyati fosh qilinganlarning 110 nafari respublika, 264 nafari viloyat va 2 742 nafari tuman (shahar) miqyosidagi vazirlik, idora va tashkilotlarda faoliyat yuritgan.

Ularning 2 103 nafari oʻzganing mulkini oʻzlashtirish va rastrata yoʻli bilan talon — toroj qilish, 265 nafari mansab mavqeyini suiisteʼmol qilish, 243 nafari firibgarlik, 169 nafari poraxoʻrlik, 51 nafari mansab soxtakorligi, 22 nafari mansabga sovuqqonlik bilan qarash, 14 nafari mansab vakolati doirasidan chetga chiqish va 249 nafari boshqa jinoyatlarni sodir etishgan.

Maʼlum qilinishicha, mansabdor shaxslarning jinoyatlari oqibatida davlat va jamiyat manfaatlariga 1 trln. 12 mlrd. soʻm miqdorida moddiy zarar yetkazilgan boʻlib, tergov jarayonida ushbu zararning 847 mlrd. soʻmi undirilgan.

• Bosh prokuratura
• Jinoyat
• Mansabdor shaxs