Istanbulda o‘zbekistonlik Durdona Hakimovaning o‘ldirilishi bo‘yicha tergov davom etmoqda. Ayolning jasadi Shishli tumanidagi chiqindi qutisidan topilgan. Bu jinoyat keng jamoatchilik e’tiroziga sabab bo‘ldi.

Sabah nashri ma’lumotlariga ko‘ra, fojia 24-yanvar kuni kechqurun ma’lum bo‘lgan. Duatepa mahallasida ikkilamchi xomashyolarni yig‘ishtirayotgan O.Ch. ismli shaxs Qo‘yulubog‘ ko‘chasidagi chiqindi qutisida turgan o‘ramda ayolning jasadini topgan.

Erkak topilma haqida politsiyaga xabar bergan. Voqea joyiga yetib kelgan kriminalistlar konteynerda ayolning boshsiz jasadini topdi. Keyinroq qo‘shni ko‘chalarni ko‘zdan kechirish chog‘ida jasadning qolgan qismlari solingan jomadon topildi.

Xabar berilishicha, jinoyat izidan O‘zbekistonning ikki nafar fuqarosi Turkiyadan Gruziyaga uchib ketmoqchi bo‘lganida qo‘lga olingan.

Durdona Hakimovaning o‘ldirilishi Istanbul va Anqarada norozilik namoyishlariga sabab bo‘ldi. Istanbulda aksiya ishtirokchilari “Usmonbey” metro bekatidan marhumning jasadi topilgan ko‘chagacha piyoda yurib bordi. Namoyishchilar “Migrant ayollar yolg‘iz emas” va “Ayollar hayoti muhim” degan yozuvlar bilan ko‘ringan.

• Ayollar
• Istanbul
• Jinoyat
• Namoyish
• Qotillik
• Turkiya