50 ming AQSh dollari evaziga oltin kukunini sotmoqchi bo‘lgan 6 nafar shaxslar ushlandi. Bu haqda Ichki ishlar vazirligi matbuot xizmati xabar berdi.

Qayd etilishicha, Samarqand viloyatidagi huquqni muhofaza qiluvchi organlarga ikki nafar fuqarolar ariza bilan murojaat qilgan.

Arizada Navoiy viloyatida yashovchi bir guruh shaxslar ularning ishonchiga kirib, 50 ming AQSh dollari evaziga 11,5 kg. oltin kukunini sotishini va Samarqand shahriga olib kelib berishlarini aytganligini maʼlum qilingan. Shuningdek, ariza mualliflari ushbu shaxslarga nisbatan qonuniy chora ko‘rishni so‘ragan.

Mazkur arizaga asosan, Samarqand viloyati IIB JQB Korrupsiya va iqtisodiy jinoyatlarga qarshi kurashish bo‘limi va DXX Samarqand viloyati boshqarmasi xodimlari hamkorligida, Samarqand tumani Yangiobod MFYda tezkor tadbir o‘tkazgan.

Ushbu tadbir davomida 6 nafar shaxslar ariza mualliflariga 11,575 kg. oltin kukunini 50 ming AQSh dollariga sotayotgan vaqtida huquq tartibod organi xodimlari tomonidan ashyoviy dalillar bilan qo‘lga olingan.

Xabarga ko‘ra, mazkur holat yuzasidan tergovga qadar tekshirish harakatlari olib borilmoqda.

• IIV
• Jinoyat
• Navoiy
• Oltin
• Samarqand