Iste’molchilar huquqlarini himoya qilish agentligiga joriy yilning o‘tgan davrida taniqli teledo‘konlardan biri “HOP SHOP”ga e’tiroz bildirib murojaatlar qilingan.

Agentlikka tushgan 90 dan ortiq murojaatlar o‘rganilganda jami zarar miqdori 51 mln so‘mdan ortiqni tashkil etgani ma’lum bo‘ldi.

“Hurmatli iste’molchilar, “Iste’molchilar huquqlarini himoya qilish to‘g‘risida”gi Qonunda iste’molchi tovar haqida, shuningdek, ishlab chiqaruvchi haqida to‘g‘ri va to‘liq ma’lumot olish va tovarni erkin tanlash va uning tegishli darajada sifatli bo‘lishini talab qilish huquqiga egaligini eslatib o‘tamiz.

Qonunga muvofiq – agar tovar haqida noto‘g‘ri yoki yetarli darajada to‘liq bo‘lmagan ma’lumot berilganligi, zarur iste’mol xossalariga ega bo‘lmagan tovar sotib olinishiga sabab bo‘lsa, iste’molchi shartnomani bekor qilishga va o‘ziga yetkazilgan zararning qoplanishini talab qilishga haqlidir;

Iste’molchining tovar haqidagi noto‘g‘ri yoki yetarli darajada to‘liq bo‘lmagan ma’lumot tufayli yetkazilgan zararni qoplash to‘g‘risidagi talablari sotib olingan tovarning xossalari va jihatlari haqida iste’molchi maxsus bilimga ega emas degan taxminga asoslanib qarab chiqiladi”, deyiladi xabarda.

Ta’kidlanishicha, Iste’molchilar huquqlarini himoya qilish agentligi xodimlarining sa’y-harakatlari tufayli barcha iste’molchilar murojaatlari ijobiy hal etilmoqda.

• Iste’molchi
• Telekanal