Bir necha kun avval Afg‘oniston temiryo‘l boshqarmasi kelishilgan chora-tadbirlarni o‘z vaqtida amalga oshira olmayotgani sababli 1-fevraldan ushbu mamlakatga temiryo‘l qatnovi vaqtincha to‘xtatilishi ma’lum qilingandi. “O‘zbekiston temir yo‘llari” AJ mazkur holatga izoh berdi.

Qayd etilishicha, 2022-yil dekabrda Afg‘onistonning maxsus komissiyasi bilan ko‘rib chiqilib, kelishilgan yangi shartnoma shartlari Afg‘oniston temir yo‘llari boshqarmasi rahbari tomonidan yangitdan sharhlanmoqda. Bunda OAV orqali o‘zbek tomonini ayblashga harakat qilinayotgani hamda kelishilgan xizmat qiymatlarini boshqacha talqin qilib o‘zini oqlash uchun foydalanilayotgani tushunarsiz vaziyatni yuzaga keltirmoqda.

Takidlanishicha, Xayraton stansiyasida amalga oshirishi lozim bo‘lgan texnik ishlarning o‘zlari tomonidan belgilangan muddatlarda bajarilmagani bo‘yicha Afg‘oniston tarafdan hech qanday tushuntirish berilmayapti.

Avvalroq Xayraton stansiyasiga yetkazib berilgan vagonlarni bo‘shatish va qaytarish ishlarini tashkil etish uchun Afg‘oniston temir yo‘l boshqarmasi “Mansor Fateh” kompaniyasini bilan shartnoma imzolagani to‘g‘risida ma’lumot tarqatilgandi. Ushbu tashkilot 31-yanvarga qadar Xayraton stansiyasida kelishilgan muddatda ishlarni tashkillashtirishga ulgurmagan.

Bundan tashqari, “Sogdiana trans” SHK tadbirkorlarni qo‘llab-quvvatlash maqsadida vaqtinchalik avtomobil transporti orqali yuklar tashuvini tashkillashtirishda yordam berishiga qaramay, qo‘shni davlat tomoni tadbirkorlarga yuklarni avtomobil transporti orqali tashimaslik to‘g‘risida tavsiya berayotgani haqida ma’lumotlar kelmoqda.

Afg‘oniston temiryo‘l boshqarmasi rahbariyatining iltimosiga ko‘ra, keyingi hafta boshida Termiz shahrida Afg‘onistonga temiryo‘l orqali yuklarni tashishni tashkil etish, Xayraton stansiyasiga yetkazib berish va olib chiqishni tashkil etish bo‘yicha “Sogdiana trans” SHK va Afg‘oniston temiryo‘l boshqarmasi o‘rtasida yangi shartnoma imzolanishi rejalashtirilmoqda.

“Shartnoma imzolangan kundan boshlab Gʻalaba – Xayraton temiryo‘li ochilishi haqidagi yangiliklarni ma’lum qilamiz”, – deyiladi xabarda.

• Afg‘oniston
• O‘zbekiston
• O‘zbekiston temir yo‘llari