Afsonaviy “Queen” guruhi yakkaxoni Freddi Merkyuriga tegishli 1500 ta buyum uning sobiq sevgilisi va do‘sti Meri Ostin tomonidan kimoshdi savdosiga qo‘yildi. Taniqli ijodkorga tegishli buyumlar orasida sahna liboslari, qo‘lyozmalar va boshqa ko‘plab buyumlar mavjud. Ayni vaqtda ushbu buyumlar Freddi Merkyurining Kensingtondagi uyida saqlanmoqda.

Lotlar orasida Britaniya monarxlarining toji ko‘rinishida ishlangan bosh kiyimi, sun’iy mo‘yna va yaltiroq toshlar bilan bezatilgan yopinchiq ham bor. Merkyuri 1986-yili Nebuortda so‘nggi marta chiqish qilganda aynan mana shu sahna libosida bo‘lgan va “God Save the Queen” qo‘shig‘ini ijro etgan.

Shuningdek, auksion ishtirokchilari “We are the Champions” qo‘shig‘ining matni yozilgan qo‘lyozma, 1975-yilda ishlab chiqarilgan “Mercury Martin D-35” akustik gitarasi kabi qimmatli lotlarni qo‘lga kiritish imkoniyatiga ega bo‘ladilar. Bundan tashqari, Freddi Merkyurining dunyo bo‘ylab sayohatlari vaqtida sotib olingan suratlar va artefaktlar ham auksionga qo‘yilgan.

To‘plam avvaliga Nyu-York, Los-Anjeles, Gongkong va London shaharlarida ko‘rgazmaga qo‘yiladi. Shundan keyin auksion o‘tkaziladi va qimmatli lotlar o‘z egalariga topshiriladi.

• Auksion
• Madaniyat
• Shou-biznes
• mashhurlar