Ushbu g‘alaba ispaniyalik tennischiga dunyoning birinchi raketkasi bo‘lish barobarida 5 million AQSh dollari miqdoridagi pul mukofotini ham taqdim etdi.

Nyu-York shahrida yakuniga yetgan tennis bo‘yicha “Katta Dubulg‘a” turkumiga kiruvchi AQSh Ochiq chempionati finalga qadar dunyoning ikkinchi raketkasi bo‘lib kelgan Karlos Alkarasning tarixiy g‘alabasi bilan tugadi.

Ispaniyalik tennischi hal qiluvchi bahsda amaldagi chempion, uzoq vaqt dunyoning birinchi raketkasi maqomida bo‘lib kelgan italiyalik Yannik Sinnerni 6/2, 3/6, 6/1, 6/4 hisoblarida mag‘lubiyatga uchratdi. Tennischilarning o‘zaro uchrashuvlarida Karlos katta farq bilan oldinda bormoqda – 11:5.

Final ikki soat-u 44 daqiqa davom etdi.

Alkaras ikkinchi bor US Open turniri chempioniga aylandi. U 2022-yilda ham bosh sovrinni boshi uzra baland ko‘targan edi. Endi u “Katta Dubulg‘a” turnirlarining 6 karra g‘olibi. US Open musobaqasidagi ikki haftalik mehnat Alkarasga mukofot pulidan tashqari 2000 reyting ochkosini ham keltirdi. Shu tariqa, ispaniyalik ATP reytingida birinchi o‘ringa ko‘tarilib oldi. Sinner esa 2,5 million AQSh dollari ishlab, reytingda esa 2-o‘ringa pastladi.

• AQSh
• Katta dubulg‘a
• Tennis