31- iyul kuni AQShning maxsus amaliyoti paytida, “Al-Qoida” xalqaro terrorchilik tashkiloti yetakchisi Qobulda o‘ldirildi.

Ayman az-Zavohiriy 2011-yil Usoma bin Lodin o‘limidan so‘ng xalqaro terrorchi guruhga rahbarlik qilib kelgan. AQSh uni uchuvchisiz qurilma yordamida o‘ldirilganini ma’lum qildi.

Jozef Bayden hodisa bo‘yicha bayonotida amaliyotning har tomonlama muvaffaqiyatli o‘tganini ta’kidlagan. Shuningdek, AQSh prezidenti Afg‘onistonni terror o‘chog‘iga aylanmasligi uchun barcha narsani amalga oshirishga va’da bergan.

Davlat kotibi Entoni Blinken “Tolibon” harakatini Doha kelishuvlarini bajarmaslikda aybladi. Uning so‘zlariga ko‘ra, toliblar Afg‘onistonga xalqaro terrorchilarni kiritmaslik va ularni asramaslik majburiyatini olgan edi.
“Endi adolat o‘rnatildi va terrorchilarning yetakchisi yo‘q”, deydi Bayden.

Misrlik Az-Zavohiriy AQSh razvedka idoralari tomonidan eng faol qidirilayotgan terrorchilar ro‘yxatida bo‘lgan va Vashington uning qayerda ekanligi haqidagi ma’lumot uchun 25 million dollargacha pul mukofoti taklif qilgan edi.

• AQSh
• Toliblar