Ijtimoiy tarmoqlarda suvni tejash maqsadida betonlanishi buyurilgan ariqlar joylardagi suv xo‘jaligi mas’ullari tomonidan daraxtlar bilan birga betonlab yuborilayotganligi haqidagi xabarlar chop etildi.

Ekologiya vazirligi bunday holatlar ro‘y bergan taqdirda, ularga sabab bo‘lgan pudratchilarga ham, mas’ullarga nisbatan ham amaliy choralar ko‘rilishini ma’lum qiladi.

Ta’kidlash lozimki, ayni damda mas’ullar tomonidan daraxtlarning betonlanishi yuzasidan o‘rganish ishlari olib borilmoqda. Xususan, Jizzax viloyatining Forish tumani, Qashqadaryo viloyatining Shahrisabz tumani, Navoiy va Namangan viloyatlarida xam daraxtlar betonlardan tozalandi.

Sirdaryo viloyatida olib borilgan o‘rganish ishlari davomida Guliston tumani “Ishonch” SIU hududida ariqlarni betonlashtirish uchun daraxtlarni kesish yuzasidan murojaat qilingan. Sirdaryo viloyati Ekologiya boshqarmasi esa daraxtlarni kesishga ruxsat bermagan. Bugungi kunda ushbu manzarali daraxtlar o‘sishdan to‘xtamagan va ularga hech qanday shikast yetkazilmagan. Ammo boshqa bir hududda daraxtlar ruxsatsiz kesilgan. Ya’ni Guliston shahri va Mirzaobod tumani hududidan oqib o‘tuvchi kanal va ariqlarni betonlashtirish jarayonida 20 tupdan ortiq daraxt ildizi bilan qo‘porib tashlangan. Natijada tabiatga 232 million 560 ming so‘m miqdorida zarar yetkazilgan. Holat yuzasidan to‘plangan hujjatlar qonuniy chora ko‘rish maqsadida viloyat prokuraturasiga yuborilgan. Hozirda holat bo‘yicha tegishli tartibda surishtiruv ishlari olib borilmoqda.

Qolgan hududlarda ham o‘rganish ishlari davom ettirilib, daraxtlar beton qoplamalardan tozalanmoqda.

• Davlat ekologiya qo'mitasi