Ma’lumotlarga ko‘ra, Germaniyada ishsizlik nafaqasi rekord darajadagi 47 milliard yevroga yetdi.

Bild gazetasi xabariga ko‘ra, Germaniyada ishsizlik nafaqasi (Bürgergeld) 2024-yilda rekord darajaga ko‘tarilib, deyarli 47 milliard yevroni tashkil etgan.

“Ishsizlik nafaqalari uchun sarf-xarajatlar sezilarli darajada oshdi. 2024-yilda to‘lovlar 46,9 milliard yevrogacha o‘sdi - bu 2023-yilga nisbatan taxminan to‘rt milliardga ko‘p. Bu yangi rekorddir”, – deb yozadi nashr vazirlik javobiga tayanib.

Qayd etilishicha, pullar jami 5,5 million nafar nafaqa oluvchilar o‘rtasida taqsimlangan, ularning deyarli 4 millioni mehnatga layoqatli aholiga tegishli, ya’ni ular kuniga kamida uch soat ishlashlari mumkin. Ushbu imtiyozdan oluvchilarning deyarli yarmi (47,4%) Germaniya fuqaroligiga ega emas.

“Xorijiy oluvchilar guruhiga bir necha yuz ming ukrainaliklar kiradi. Vazirlik maʼlumotlariga koʻra, 2024-yilda ularga 6,4 milliard yevro sarflangan.

Germaniyada daromadi kam yoki umuman bo‘lmagan mehnatga layoqatli shaxslar fuqarolik nafaqasini olish huquqiga ega. Bir kishi uchun oylik Burgergeld to‘lovi 563 yevrogacha ekanligi bildirilgan.

• Germaniya
• Nafaqa
• ishsizlik