Amerikalik xonanda Billi Aylish Turetta sindromi va ushbu kasallik xurujlari tufayli koʻp hollarda atrofdagilarning kulgisiga qolib ketishi haqida gapirdi.

Turetta sindromi Billi 11 yoshga toʻlgan vaqtida aniqlangan. Bolalikda uning belgilari yaqqol koʻzga tashlanmagan boʻlsa ham, oʻsmirlik davriga kelib xurujlar soni koʻpayib ketgan. Bu esa boʻlgʻusi xonandaning tengdoshlari kulgisiga sabab boʻlgan.

Ammo, ushbu ogʻir xastalik Billining jahon yulduzi sifatida tan olinishiga toʻsqinlik qila olmadi.

“Odamlar koʻp hollarda men atayin gʻalati koʻrinishga urinayotganimni taxmin qilib, ustimdan kulishadi. Bundan juda xafa boʻlaman”, dedi Aylish.

Ijodkor avvaliga kasalligi haqida hech kimga aytmaslikka qaror qilgan, ammo kontsertlar va intervyular vaqtida sodir boʻlgan xurujlardan keyin ogʻir kasallikka chalinganini tan olishga majbur boʻlgan.

Turetta sindromi – asab tizimi kasalligi boʻlib, nazorat qilish imkonsiz boʻlgan harakatlar va tovushlar orqali namoyon boʻladi. Kasallik xuruj qilgan vaqtda bemorning boʻyin, yuz qismi, yelkalari beixtiyor harakatlanadi, tili va lablari bilan tez va tartibsiz harakatlarni amalga oshiradi, koʻzlarini turli tomonlarga qaratib, tushunarsiz tovushlar hosil qiladi.

Afsuski, ushbu kasallikni davolash imkonini beruvchi birorta usul yoki dori vositasi mavjud emas.

• Shou-biznes
• mashhurlar