Shoir Bobur Bobomurod xonandalar Farhod va Shirindan ular qoʻshiq qilib kuylagan va oʻzi tomonidan yozilgan sheʼrlar uchun mualliflik huquqini talab qilib, Intellektual mulk agentligiga murojaat yoʻlladi.

Maʼlum boʻlishicha, xonandalar bir vaqtlar Farhod va Shirin juftligini yaratgan shoirni ustoz sifatida tan olishmayapti, bu esa shoir tomonidan ularga nisbatan taqiq qoʻyilishiga sabab boʻlgan. Shoir juftlik tomonidan kuylangan 50 dan ortiq qoʻshiq uchun sheʼrlar yozgan. U Adliya vazirligi huzuridagi Intellektual mulk agentligiga oʻziga tegishli boʻlgan “Farhod va Shirin” xizmat koʻrsatish belgisidan uning huquqiy egasi roziligisiz foydalanib kelinayotgani holati boʻyicha murojaat kiritgan.

Intellektual mulk agentligi fuqarolar S.F va Z.Sh tomonidan shoirga tegishli boʻlgan “Qalbim bahori”, “Hayot” nomli sheʼriy asarlar muallif bilan shartnoma tuzmasdan, uning roziligisiz kuylangani va omma eʼtiboriga yetkazilgani, buning natijasida mualliflik huquqi buzilganini aniqlagan. Shuningdek, huquq egasiga tegishli boʻlgan tovar belgisidan uning egasi bilan shartnoma tuzmasdan foydalanish holati qayd etilgan. Agentlik tomonidan mazkur holat boʻyicha maʼmuriy javobgarlik toʻgʻrisida bayonnoma rasmiylashtirilgan va tegishli sudga yuborilgan.

• Madaniyat
• San’at
• Shou-biznes
• mashhurlar