O‘zbekiston Respublikasi Konstitutsiyasining 64-, 77-moddalariga asosan, ota-onalar va ularning o‘rnini bosuvchi shaxslar o‘z farzandlarini voyaga yetguniga qadar boqishi, ularning tarbiyasi, ta’lim olishi, sog‘lom, to‘laqonli va har tomonlama kamol topishi xususida g‘amxo‘rlik qilishga majburdirlar.

Byuroning Xiva shahar bo‘limi ish yurituviga fuqarolik ishlari bo‘yicha Bog‘ot tumanlararo sudining 16.08.2017-yildagi qarzdor R.Karimovdan bir nafar farzandining moddiy ta’minoti uchun har oydagi daromadining ¼ qismi miqdorida aliment undirish ko‘rsatilgan ijro hujjati kelib tushgan.

Keyinchalik ushbu sudning 2023-yildagi hal qiluv qaroriga asosan, aliment to‘lovlari 1/6 qismga o‘zgartirilgan. Ota tomondan belgilangan aliment pullari ixtiyoriy ravishda oyma-oy to‘liq to‘lab kelingan. Joriy yilning 20-oktyabrida ota farzandi voyaga yetgunga qadar to‘lanishi lozim bo‘lgan aliment pullarini oldindan to‘lash istagini bildirib, 2032-yilga qadar bo‘lgan jami 156,7 mln. so‘m aliment to‘lovlarini amalga oshirganligi sababli, ijro ishi amalda tamomlangan.

Yana shunday holat Yuqori Chirchiq tumanida amalga oshirilgan. Qarzdor tomonidan farzandi voyaga yetgunga qadar bo‘lgan aliment pullarini oldindan to‘lash taklifi bildirilgan. Undiruvchi ushbu taklifni qabul qilgani sababli davlat ijrochisi tomonidan mazkur ijro ishi bo‘yicha qolgan aliment qarzdorligi hisoblanib, jami 53 mln. 54 ming so‘mni tashkil etgan. Ushbu summa qarzdordan to‘liq undirilib, tilxatga asosan undiruvchiga topshirilgan va ijro ishi tamomlangan.

• Aliment
• FHDYo
• MIB