O‘zbekiston Respublikasi Prezidenti Shavkat Mirziyoyev 9-avgust kuni Ozarbayjon Respublikasi Prezidenti Ilhom Aliyev bilan telefon orqali muloqot qildi.

O‘zbekiston rahbari qardosh Ozarbayjon yetakchisi va xalqini tarixiy voqea – kuni kecha Vashington shahrida Ozarbayjon va Armaniston o‘rtasida tinchlik deklaratsiyasi imzolangani bilan samimiy qutlagan.

Tez fursatda tinchlik bitimi rasman imzolanishi Janubiy Kavkazda tinchlik, barqarorlik va ravnaqni ta’minlashda muhim ahamiyat kasb etishiga ishonch bildirilgan.

Shuningdek, O‘zbekiston Prezidentining joriy yil iyul oyida Ozarbayjonga davlat tashrifi davomida erishilgan kelishuvlarni amalga oshirish doirasida ikki tomonlama strategik sheriklik va ittifoqchilik munosabatlarini yanada rivojlantirish va mustahkamlashning dolzarb masalalari muhokama qilingan.

Barcha darajalarda samarali muloqot va almashinuvlar davom etmoqda. Joriy yil boshidan tovar ayirboshlash 30 foizga oshgan. “Yo‘l xaritasi” asosida iqtisodiyotning turli tarmoqlarida istiqbolli kooperatsiya loyihalari shakllantirilmoqda. Neft-gaz sohasidagi strategik loyiha bo‘yicha imzolangan Mahsulot taqsimotiga oid bitim doirasida amaliy ishlar olib borilmoqda.

Yetakchilar bo‘lajak oliy darajadagi uchrashuv va tadbirlar rejasini ham ko‘rib chiqishgan.

• Ilhom Aliyev
• Mirziyoyev
• Ozarbayjon
• O‘zbekiston
• Telefon
• muloqot