Toshkent shahri Chilonzor tumani kengashi deputati, xonanda Shohrux Shodmonov mas’ullarni havo ifloslanishiga qarshi real harakatlar boshlashga chaqirdi.

“Yurtimizda havo buzilishini ochiqcha aytaylik: bu “mavsumiylik” yoki “tabiiy jarayonlar” emas, bu — befarqlik natijasidir. Bolalarimiz zaharli havodan nafas olmoqda. Odamlar niqob va tozalagichlar bilan o‘z sog‘lig‘ini himoya qilishga urinmoqda. Biroq, hammaning ham bunday narsalarni sotib olishga imkoni yo‘q. Aholi qo‘lidan kelganini qilmoqda, lekin mas’ul tuzilmalar hanuz faqat hisobot va izohlar bilan cheklanmoqda”, — deya qayd etdi deputat.

Uning ta’kidlashicha, ekologiya mas’ullari bu masalani tez, qat’iy va keskin tarzda hal qilishi kerak.

“Sizlarning sustkashligingizdan millionlab tirik odamlar aziyat chekyapti. Shu kunlarda sizlarga kengaytirilgan vakolatlar va real vositalar berildi. Bu sizlar uchun qahramonlarga aylanish imkoniyati!” — deya yozadi u.

“Agar shundan keyin ham hech nima qila olmasangiz, unda bilmadim sizlarni nima deb atashni. Shuning uchun ko‘p gapirmasdan amaliy jasorat ko‘rsating!” — deb postini yakunlagan Shohrux Shodmonov.

• Deputat
• Havo
• Ob-havo
• Toshkent