Davlat chegarasini qo‘riqlash bo‘yicha o‘tkazilgan tezkor tadbirlar davomida Farg‘ona viloyatida katta miqdordagi narkotik moddalar aniqlandi.

Ma’lum bo‘lishicha, Sirdaryo daryosining Beshariq tumani hududidan o‘tuvchi qirg‘og‘ida noma’lum shaxslar tomonidan tashlab ketilgan 4 ta polietilen qop topilgan.

Qoplar ko‘zdan kechirilganda, ularda jami 47 kg 113 gramm “gashish”, 7 kg 779 gramm “opiy” hamda ko‘p miqdorda dori vositalari borligi aniqlangan. Xususan, 10 710 dona “Lidaza” va 756 dona “Tenoksikam” preparatlari musodara qilingan.

Dastlabki ma’lumotlarga ko‘ra, ushbu moddalar qo‘shni davlatdan kontrabanda yo‘li bilan olib kirilgan.

Holat yuzasidan Jinoyat kodeksining kontrabanda moddalari asosida jinoyat ishi qo‘zg‘atilib, tergov harakatlari olib borilmoqda.

Hozirda huquq-tartibot organlari tomonidan ushbu noqonuniy yuk egalarini aniqlash bo‘yicha tezkor choralar ko‘rilmoqda.

• DXX
• Farg‘ona