Oliy Majlis Qonunchilik palatasi deputati Rasul Kusherbayev hududlarda Xalq deputatlari Kengashlarining vakolatlarini oshirish uchun kengashlarga ko‘p vakolatlar berilayotgani, ammo Xalq deputatlari kengashlariga raislik qilish hokimlarda qolayotganiga eʼtibor qaratmoqda.

“Hokimlar bir vaqtning o‘zida Xalq deputatlari kengashlariga raislik qilishadi. Yaʼni qaror chiqaradigan deputatlarga boshliq ham, ijro qiladigan ijro hokimiyatiga boshliq ham bir shaxs: ikkitasi birda”, – deb yozadi deputat.

Shuningdek, Kusherbayev so‘nggi vaqtlarda fermerlarga yer berish, “snos” bo‘yicha qarorlarni ko‘rib chiqish, maktab direktorlarini tasdiqlash kabi masalalar Xalq deputatlari Kengashlari vakolatlariga kiritilganini eʼtirof etib, bu ishlar ham joylarda deputatlarning obro‘ va maqomi oshishiga xizmat qilmayotganini aytadi.

“Aksincha, Kengash raisi bo‘lgan hokimlarning o‘xshamay qolgan rejalariga “straxovka” vazifasini o‘tamoqda: jamoatchilik yaxshi qabul qilgan qaror bo‘lsa “bu janob hokimning qarori, tashabbusi”, jamoatchilik eʼtiroz qilsa “bu deputatlarning qarori” bo‘ladi.

Qizig‘i aslida shuki ikkala holatda ham qarorlarni bitta shaxs imzolaydi”, – deydi deputat.

Kusherbayevning taʼkidlashicha, shu vajdan ham, toki Xalq deputatlari kengashlariga hokimlar raislik qilishda davom etar ekan, kengashga berilgan vakolat deputatlargamas, hokimlarga xizmat qiladi. Va Kengash qarorini “deputatlar qarori, deputatlar xohishi”, deb aytib bo‘lmaydi. Bu, aslida, hokimning qarori, hokimning xohishi.

“Shuning uchun ayrim hurmatli hokimlarimiz jamoatchilik eʼtiroziga sabab bo‘layotgan masalalarga deputatlarni “krayniy” qilishi nomardlikdan boshqa narsa emas.

Keyin deputatlar Jizzaxdagi kabi o‘z hokimining murojaatini eshitish uchun Sessiyaga shaxsiy mulki – telefoni bilan kirishdan va savol berishdan mahrum qilinayotgan bir vaqtda “deputatlar qarori” degan gapni eshitish absurddan bo‘lak hech narsa emas”, – deydi Rasul Kusherbayev.

Maʼlumot uchun, Harakatlar strategiyasini 2019-yilda amalga oshirishga oid davlat dasturi qabul qilingan va Dasturning  28-bandida 2019-yilning 1-mart sanasiga qadar “hokimning xalq deputatlari Kengashi raisi sifatidagi maqomini bekor qilish” ko‘rsatilgan edi.

Bunga esa Oliy Majlis palatalari, Vazirlar Mahkamasi, Adliya vazirligi, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari masʼul etib belgilangan.

Keyinroq esa Oliy Majlis palatalari Kengashining 2019-yil 14-fevraldagi 2349-III/KQ-506-III-sonli Qo‘shma qaroriga asosan, “Viloyat, tuman, shahar hokimlarining xalq deputatlari Kengashi raisi sifatidagi maqomini bekor qilish masalasini o‘rganish yuzasidan tuzilgan ishchi guruh” tuzilgan va unga o‘sha vaqtdagi Senat raisining o‘rinbosari Svetlana Artikova raxbar etib tasdiqlangan.

“Lekin o‘tgan davrda ushbu ishchi guruhi qanday ishlaganini ko‘pchiligimiz bilmaymiz. Bilganimiz – Prezident farmoni bilan tasdiqlangan butun boshli Davlat dasturidagi vazifa ijrochi va masʼular tomonidan  bajarilmadi.

Va shu sabab mahalliy darajada “ikkitasi birda” bo‘lgan absurd boshqaruv davom etmoqda”, – deydi Kusherbayev.

• Deputat
• Qonunchilik palatasi
• hokim