Toshkent metropolitenida 16 ta bekatda kassalar yopilib, infokioskalar ishga tushiriladi.

Toshkent metropoliteni rahbariyati to‘lov tizimida shaffoflikni ta’minlash, xizmat sifatini oshirish hamda elektron to‘lovlarni rag‘batlantirish maqsadida bir qator bekatlarda kassalar faoliyatini to‘xtatmoqda. Xususan, 2025-yil 9-dekabrdan boshlab:

“Yerusti halqa yo‘li” yo‘nalishidagi barcha 14 ta bekatda, “Paxtakor” va “Alisher Navoiy” bekatlarida kassalar yopiladi.

Bu bekatlarda zamonaviy QR-kodli chiptalar beruvchi infokioskalar ishga tushirildi. Infokioskalar afzalliklari:

Naqd pul aylanmasi kamayib, to‘lovlar yanada shaffof va xavfsiz bo‘ladi;

Chipta xaridi tezlashadi, navbatlar qisqaradi;

QR-kodli chiptadan mobil telefon orqali yoki chop etilgan kvitansiya ko‘rinishida foydalanish mumkin.

Bugungi kunda poytaxt metropoliteni yo‘lovchilariga qulaylik yaratish hamda kassa oldidagi tirbandliklarni kamaytirish maqsadida yo‘l haqini to‘lashning 10 dan ortiq turi mavjud bo‘lib, metroda to‘lov tizimini amalga oshirishda elektron turdagi to‘lov usullari yanada rivojlanib bormoqda. Shuningdek, metro xizmatidan kamdan kam foydalanuvchilar uchun yanada qulaylik hosil qilish maqsadida ko‘plab bekatlarda chipta sotib olish uchun mo‘ljallangan avtomatlashtirilgan bankomatlar o‘rnatilmoqda.

Shu sababli kassa operatori lavozimidagi xodimlarga bo‘lgan talab kamayib bormoqda. Shu munosabat bilan yopilgan kassalardagi operator lavozimi ish o‘rinlari bosqichma-bosqich qisqartirilmoqda. Jumladan, birinchi bosqich doirasida 204 ta kassa operatori lavozim shtatlari belgilangan normativ huquqiy hujjatlar asosida qisqartirildi.

Avtomatlashtirilgan bankomatlarni metropolitenning barcha bekatlarida yil yakuniga qadar o‘rnatish rejalashtirilgan va buning natijasida Toshkent metropolitenida kassa operatori va katta operator lavozimlariga bo‘lgan ehtiyoj qolmaydi hamda ushbu lavozimlar to‘liq tugatiladi.

• Metro
• Toshkent