Yel universitetining gumanitar fanlar tadqiqot laboratoriyasi direktori Nataniel Reymondning ta’kidlashicha, Al-Fashir shahridagi vaziyat kushxonaga o‘xshaydi. Uning jamoasi tomonidan tahlil qilingan sun’iy yo‘ldosh suratlari bir vaqtlar 1,5 million aholi istiqomat qilgan Al-Fashir deyarli bo‘shab qolganini ko‘rsatadi.

“Tezkor harakat kuchlari (RSF) jangarilari Al-Fashir ustidan nazorat o‘rnatganidan so‘ng, butun shahar “ommaviy qirg‘in makoni”ga aylandi. Hamma joyda jasadlar uyumlari va ommaviy qabrlar ko‘rinib turibdi”, — deydi Reymond.

“BMTning urush jinoyatlari bo‘yicha tergovchilari Al-Fashirga kirish imkoniga ega emas, shuning uchun o‘lganlarning aniq soni noma’lum. Biroq Buyuk Britaniya Jamoatchilik palatasi taraqqiyot qo‘mitasi tadqiqotchilarining hisob-kitoblariga ko‘ra, uch hafta davomida birgina Al-Fashirda kamida 60 ming kishi halok bo‘lgan. Yana 150 ming aholi bedarak yo‘qolgan, ular qochishga muvaffaq bo‘lgani haqida ma’lumot yo‘q”, – deya yozmoqda Bild nashri.

Inson huquqlari faollari Al-Fashirdagi voqealarni 2023-yilning aprel oyida boshlangan va 400 mingga yaqin odamning o‘limiga hamda 13 million odam uy-joyini tashlab ketishiga olib kelgan Sudandagi fuqarolar urushida yuz berayotgan “eng dahshatli urush jinoyati” deb atamoqda.

• Sudan
• Urush