Bosh prokuratura huzuridagi Departamentning Toshkent shahar boshqarmasi, DXX va IIBB xodimlari hamkorlikda Yunusobod tumanida joylashgan “Universam dehqon bozori” oldida o‘tkazilgan tezkor tadbirda qalbaki pul tayyorlash bilan shug‘ullanayotgan shaxslar aniqlangan.

Fuqarolar N.R., X.A. (muqaddam sudlangan) va boshqalar o‘zaro til biriktirib, Toshkent tumanida yashovchi S.M.dan olib kelgan 100 dollarlik kupyuradagi qalbaki 10 ming AQSh dollarini fuqaro A.O.ga haqiqiy 7,2 ming AQSh dollariga sotgan vaqtlarida ushlanib, X.A.ning yonidan o‘tkazish maqsadida saqlab kelingan yana 75 dona 100 dollarlik qalbaki kupyuralar ashyoviy dalil sifatida olingan.

Mazkur holatlar yuzasidan Jinoyat kodeksining 176-moddasi (qalbaki pul, aksiz markasi yoki qimmatli qog‘ozlar yasash, ularni o‘tkazish) bilan jinoyat ishi qo‘zg‘atilib, tergov harakatlari o‘tkazilmoqda.

Bundan oldin xorijiy davlatga yuborishni va’da qilgan shaxsning yonidan qalbaki 8,4 ming AQSh dollari chiqqan edi.

Departamentning Uchtepa tumani bo‘limi, DXX va IIB xodimlari hamkorligida “L.” nomli – “Hostel” oldida o‘tkazilgan tezkor tadbirda xorijiy davlat fuqarosi M.S. firibgarlik yo‘li bilan o‘zganing mulkini qo‘lga kiritish maqsadida, fuqaro Z.A.ni Angliya davlatiga borishi uchun 850 AQSh dollariga viza olib berishini aytib, shundan 350 AQSh dollarini olgan vaqtida ashyoviy dalil bilan ushlangan.

Bundan tashqari, M.S.ning yonidan o‘tkazish maqsadida saqlab kelingan 84 dona 100 dollarlik kupyuradagi qalbaki 8,4 ming AQSh dollari ashyoviy dalil sifatida olingan.

Mazkur holatlar yuzasidan Jinoyat kodeksining tegishli moddalari bilan jinoyat ishi qo‘zg‘atilib, tergov harakatlari o‘tkazilmoqda.

• Dollar