Giyohvandlik vositalarining noqonuniy aylanmasiga qarshi kurashish doirasida Davlat xavfsizlik xizmatining Surxondaryo viloyati bo‘yicha boshqarmasi xodimlari tomonidan viloyat bojxona va ichki ishlar boshqarmalari bilan hamkorlikda tezkor tadbirlar o‘tkazildi.

Xususan, Termiz tumanida harakatlanayotgan “Matiz” rusumli avtomashina to‘xtatilib, ko‘zdan kechirilganda, unda yo‘lovchi sifatida ketayotgan, 1979-yilda Samarqand shahrida tug‘ilgan, Termiz shahrida vaqtincha istiqomat qiluvchi, muqaddam sudlangan fuqaroning yonida 4 kg 827 gr “opiy” moddasi borligi aniqlanib, ashyoviy dalil sifatida rasmiylashtirib olindi.

Tezkor surishtiruv harakatlari davomida, ushbu giyohvandlik vositasi muqaddam afg‘onistonlik narkokuryerlar tomonidan kontrabanda yo‘li bilan keltirib berilganligi ma’lum bo‘ldi.

Boshqa holatda esa Sariosiyo tumanida yashovchi, 1979 va 1982-yillarda tug‘ilgan aka-uka 3 kg 627 gr “opiy” va 919 gr “gashish” moddalarini 30 ming AQSh dollariga sotgan vaqtlarida ushlandi.

Aniqlanishicha, ushbu giyohvandlik vositalari muqaddam tojikistonlik narkokuryerlar tomonidan kontrabanda yo‘li bilan Sariosiyo tumaniga keltirib berilgan.

Ta’kidlash lozimki, mazkur aka-uka muqaddam giyohvandlik vositalari bilan bog‘liq jinoyatlari uchun sudlangan bo‘lsa-da, o‘z xatolaridan to‘g‘ri xulosa chiqarishmagan.

Hozirda har ikki holat yuzasidan mazkur fuqarolarga nisbatan Jinoyat Kodeksining 246 va 273-moddalari bilan jinoyat ishlari qo‘zg‘atilib, qamoqqa olish tarzidagi ehtiyot chorasi qo‘llanilgan.
Tergov harakatlari olib borilmoqda.

• DXX
• Giyohvandlik
• IIB
• Surxondaryo
• Termiz