“Hududiy elektr tarmoqlari” AJ “Energosavdo” filiali Sho‘rchi tuman bo‘limi muhandisi xizmat mavqeini suiiste’mol qilib, fuqaroga tegishli savdo do‘konida elektr energiyasidan foydalanish bo‘yicha aniqlangan qoidabuzarlik holati yuzasidan tuzilgan dalolatnomani qonuniy tartibda ko‘rib chiqmaslik, ishni sudga yubormaslik hamda yangi elektr hisoblagich o‘rnatib, ro‘yxatdan o‘tkazib berish evaziga 1000 AQSh dollari talab qilib, dastlab 200 AQSh dollari va 1 mln 50 ming so‘m olgan.

Davlat xavfsizlik xizmatining Surxondaryo viloyati bo‘yicha boshqarmasi xodimlari tomonidan Ichki ishlar organlari va IJQKD bilan hamkorlikda o‘tkazilgan tezkor tadbirda u qolgan 500 AQSh dollari va 2,4 mln so‘mni olgan vaqtida ushlandi.

Andijon viloyatida kuzatilgan holatda esa Baliqchi tuman elektr ta’minoti korxonasi boshlig‘i o‘rinbosari o‘z xizmat mavqeidan foydalanib, tuman ETK xodimlarining faoliyat ko‘rsatkichlarini baholaydigan oylik hisobotlarini “Hududiy elektr tarmoqlari” AJ Andijon hududiy filialidagi tanishlari orqali ijobiy hal etib berish evaziga pul talab qilgan.

Davlat xavfsizlik xizmati va Bosh prokuratura huzuridagi Departament hamkorligida o‘tkazilgan tezkor tadbirda mansabdor shaxs ETK xodimlari tomonidan yig‘ib berilgan 300 AQSh dollarini olgan vaqtida ashyoviy dalillar bilan ushlandi.

Hozirda qonunbuzarlarga nisbatan jinoyat ishlari qo‘zg‘atilib, tergov harakatlari olib borilmoqda.

• Andijon
• DXX
• Elektr energiyasi
• Korrupsiya
• Surxondaryo