Prezident Shavkat Mirziyoyev raisligida Buxoro viloyatini ijtimoiy-iqtisodiy rivojlantirish masalalari yuzasidan videoselektor yig‘ilishi bo‘lib o‘tdi.

Unda ijtimoiy soha bilan bog‘liq masalalar muhokama qilinar ekan, Gʻijduvon aholisi uchun 650 o‘rinli zamonaviy shifoxona qurilishi e’lon qilindi.

“Mutasaddilarga loyiha hujjatlarini ishlab chiqib, kelgusi yil investitsiya dasturiga kiritish topshirildi.

Umuman, yig‘ilishda Gʻijduvonning o‘zida 25 ming ish o‘rni, qo‘shimcha 50 million dollar eksport va byudjetga 100 milliard so‘mlik tushum bo‘yicha imkoniyatlar ko‘rsatib o‘tildi.

Yig‘ilishda muhokama qilingan masalalar yuzasidan viloyat va tarmoq rahbarlarining axboroti tinglandi.

Shuningdek, Gʻijduvonda bu yil 3 mingga yaqin yoshlar maktabni bitirmoqda va 800 nafari oliygohga kirmasdan, kasbga o‘qish istagini bildirgan.

Viloyatdagi eng yirik to‘qimachilik korxonalaridan biri – “Parvoz humo” korxonasi matoni bo‘yash va tayyor kiyim-kechak syexlarini ishga tushirmoqda.

Tadbirkor 10-11-sinf va kollej o‘quvchilariga darsdan so‘ng kasb o‘rgatib, 2 million so‘mgacha oylik to‘lash, bepul tushlik va tekin avtobus bilan ta’minlash taklifini bildirgan.

Bundan tashqari, tadbirkor tumandagi 2-son kasb-hunar kollejiga korxona syexlaridan “amaliy monomarkaz” sifatida foydalanishga, Buxoro muhandislik-texnologiya instituti kafedrasini korxona hududida joylashtirib, ham o‘qituvchilarga, ham talabalarga sharoit qilib berishga tayyor.

Davlatimiz rahbari tadbirkorning barcha tashabbuslarini qo‘llab-quvvatladi va mutasaddilarga tegishli topshiriqlar berdi”, – deyiladi xabarda.

• Buxoro
• Shavkat Mirziyoyev
• Sherzod Asadov
• Videoselektor
• shifoxona