Konservativ faol Charli Kirkni o‘ldirishda gumonlanayotgan shaxs aybini tan olmadi va tergov bilan hamkorlik qilishdan bosh tortmoqda.

Bu haqda Yuta shtati gubernatori Spenser Koks “ABC News”ga bergan intervyusida ma’lum qildi.

“Gumonlanuvchi aybini tan olmadi, tergov bilan hamkorlik qilmayapti. Ammo uning atrofidagi barcha insonlar tergov bilan hamkorlik qilmoqda, menimcha, bu juda muhim” - dedi gubernator.

Koksning so‘zlariga ko‘ra, gumonlanuvchi Tayler Robinsonga rasmiy ayblov seshanba kuni e’lon qilinishi kutilmoqda.

Avvalroq AQSh prezidenti Donald Trampning tarafdori va konservativ faol Charli Kirkning o‘ldirilishida gumonlanib 22 yoshli Tayler Robinson qo‘lga olingani ma’lum bo‘lgan edi.

Avvalroq Spenser Koks intervyusida Robinson “so‘l qanot mafkurasidan chuqur ta’sirlangan”ligini aytgan edi.

ABC News muxbirining “Tergovchilar bunga oid dalillar topganmi?” - degan savoliga gubernator: “Hozircha bu ma’lumotlar uning tanishlari va oila a’zolari tomonidan berilgan” — deb javob berdi.

• AQSh
• Jahon
• Qotillik
• Siyosat