Isroil bosh vaziri bu haqda AQSh davlat kotibi Marko Rubio bilan uchrashuvda aytib o‘tgan.

“Biz turli davlatlar, jumladan Qatar boshchiligida Isroilni yakkalashga bo‘lgan urinishlar mavjudligidan xabardormiz. Qatar va Xitoy tomonidan moliyalashtirilayotgan axborot blokadasi amalga oshirilmoqda. Ular G‘arbda, shu jumladan AQShda ham faol harakat qilmoqda”, — degan siyosatchi.

Uning so‘zlariga ko‘ra, Qatar va Xitoy sun’iy intellekt sohasiga ulkan mablag‘lar sarmoya qilmoqda va shu orqali an’anaviy ommaviy axborot vositalaridan ko‘ra kattaroq ta’sir kuchiga ega bo‘lmoqda. Biroq oddiy ommaviy axborot vositalari ham izolyatsiyaga qo‘shilmoqda.

Netanyaxuning ta’kidlashicha, bu izolyatsiya boshqa sohalarga ham tarqalishi va Isroil iqtisodiy jihatdan to‘liq o‘zini ta’minlash — avtarkiya rejimini joriy etishga majbur bo‘lishi mumkin.

“Shuningdek, Isroil mudofaa sanoati uchun ham tahdidlar yuzaga kelmoqda. Biz Yevropalik qurol ishlab chiqaruvchilarga bog‘liqlikni kamaytirish uchun harbiy sanoat sohasiga sarmoyalarni oshirishda davom etamiz”, — deya qo‘shimcha qilgan Isroil bosh vaziri.

• Binyamin Netanyaxu
• Isroil
• Qatar
• Xitoy