Dushanba kuni Hindiston va Bangladesh qirg‘oqlarida yirik siklon tufayli kuchli shamol bo‘ldi va kuchli yomg‘ir yog‘di. Bu haqda “Reuters” xabar berdi.

Qayd etilishicha, voqea sabab 16 kishi halok bo‘lgan va millionlab odamlar elektr ta’minotisiz qolgan.

Tabiiy ofatlarni boshqarish bo‘limi boshlig‘i Mijanur Rahmanning ta’kidlashicha, ba’zi qurbonlar yo‘lda yoki uylari yoxud devorlari qulaganda halok bo‘lgan yoki bo‘ron paytida cho‘kib ketgan.

“Odamlar odatda chorva mollari va uylarini tashlab ketishni istamaydilar. Ular oxirgi daqiqagacha kutishadi va ko‘pincha juda kech bo‘ladi”, - dedi u.

Hindistonning G‘arbiy Bengal shtati rasmiylariga ko‘ra, to‘rt kishi elektr toki urishi oqibatida halok bo‘lgan. Hozirda mintaqada qurbonlar soni oltitaga yetdi.

Bangladesh poytaxti Dakkada suv bosgan yo‘llar tufayli transport qatnovi to‘xtagan. Hindistonning Kalkutta shahrida ham yomg‘ir oqibatida ko‘plab ko‘chalarni suv bosgan.

“Ikkala davlatda ham bir millionga yaqin odam boshpanalarga ko‘chirildi, Bangladeshda 800 mingga yaqin va Hindistonda 110 mingga yaqin odam ko‘chirildi”, - dedi rasmiylar.

• Bangladesh
• Hindiston
• Suv toshqini