Xitoyning texnologiya ishlab chiqaruvchi eng yirik korporatsiyalaridan biri hisoblangan Huawei taqdimotida aqlli ko‘zoynaklarning ikkinchi avlodi bo‘lgan “Eyewear 2” namoyish etildi, uning yanada murakkab dizayn va yangi ramkali variantlari – titan va tilla bilan qoplangan.

Titan versiyasida og‘irligi atigi 4,7 gramm bo‘lgan yengil b-titanli ramka mavjud, oltin versiyada esa 18 karat oltin qoplama va zamonaviy yupqa ramkalar mavjud. “Eyewear 2”ni foydalanuvchilarga qulayroq qilish uchun Huawei birinchi versiyaga nisbatan quloqchinlar kengligini 20 foizga qisqartirdi, natijada qurilmaning maksimal eni 9,7 millimetrga, orqa eni esa 28 foizga yoki 8,3 millimetrga qisqardi.

Birinchi versiya kabi, yangi qurilma ham musiqa va qo‘ng‘iroqlarning boshqalarga eshitilmasligini ta’minlaydi. “Huawei Eyewear 2”da oldinga yo‘naltirilgan ikki diafragmali audio bloki mavjud bo‘lib, u dinamik amplitudasini 40 foizga, ijro hajmini esa 30 foizga oshiradi. Ko‘zoynaklar, shuningdek, uch marta shovqinni kamaytirish tizimi bilan jihozlangan bo‘lib, gaplashayotganda ovozni aniq eshitish imkonini beradi.

Yaxshilangan datchiklar sensorli boshqaruv maydonini 23 millimetrga oshiradi, bu avvalgi modelga nisbatan 50 foiz kattaroq degani. Ishlab chiqaruvchining ta’kidlashicha, bu tasodifiy teginish xavfini ham minimal darajada kamaytiradi.

Ko‘zoynaklar bir vaqtning o‘zida bir nechta qurilmalarga uzluksiz ulanishni qo‘llab-quvvatlaydi. Ular “HarmonyOS”da bir nechta gajetlar o‘rtasida tez almashishni ta’minlaydi, lekin Android, iOS va Windows bilan ham “til topisha oladi”.

Avtonomiyaga kelsak, yangi ko‘zoynaklar musiqa yoki podkastlarni 11 soat tinglash (avvalgi avlodga qaraganda 83 foizga ko‘proq) yoki 9 soat suhbatlashish imkonini beradi. To‘liq zaryadlash 50 daqiqa davom etadi va atigi 10 daqiqa zaryadlash 3 soat tinglash uchun yetarli. Korpus chang va namlikdan himoyalangan (IP54).

Ma’lumot uchun, “Huawei Eyewear 2” birinchi avlod kabi 1699 yuan (taxminan 2 850 000 so‘m) narxda standart ramka variantlarini taklif etadi, 18 karatli tilla ramkalisi esa 1899 yuanga (3 180 000 so‘m), titan ramkali qurilma esa 2299 yuanga (3 850 000 so‘m) baholanmoqda. Xitoyda sotuvlar 30-sentyabr kuni boshlanadi, global versiyasining sotuvga chiqarilishi hali e’lon qilinmagan.

Shuningdek, kompaniya yangi “FreeBuds Pro 3” simsiz quloqchinlarni ham rasman taqdim etdi. Bu flagman seriyasidagi model bo‘lib, tashqi tomondan, avvalgisidan deyarli farq qilmaydi, ammo yashil rang varianti paydo bo‘ldi.

“FreeBuds Pro 3”ning yangiligi shundaki, qayta zaryadlashni hisobga olgan holda u 33 soat doimiy ishlashi mumkin. Hatto yo‘qolgan taqdirda ham, ovozli signal yordamida uni oson topib olish mumkin. Boshlang‘ich narxi taxminan 1499 yuanga (2 500 000 so‘m) baholangan.

• Huawei
• Xitoy
• texnologiya