Qozog‘iston hukumati kelgusi besh-olti yil ichida Shimoliy Orol dengizidagi suv sathini 44 metrgacha ko‘tarishni rejalashtirmoqda. Buning uchun Sirdaryo orqali har yili kamida 2 mlrd kub metr suvni dengizga yo‘naltirish ko‘zda tutilgan. Bu haqda “KazTAG” xabar berdi.

Rejaga ko‘ra, Shimoliy Orol dengizining suv maydoni 3,9 ming kvadrat kilometrga, suv hajmi esa 34 mlrd kub metrga yetkaziladi. Mazkur ko‘rsatkichlar Jahon banki bilan hamkorlikda ishlab chiqilgan Shimoliy Orolni tiklashning navbatdagi bosqichiga kiritilgan. Loyiha Ko‘korol to‘g‘onini rekonstruksiya qilish hamda suv resurslaridan samarali foydalanish bo‘yicha chora-tadbirlarni o‘z ichiga oladi.

Hozir Shimoliy Orol dengizidagi suv hajmi 23,4 mlrd kub metrni tashkil etadi. 2022 yilda bu ko‘rsatkich 19 mlrd, 2023 yilda 21 mlrd, 2024 yilda 22 mlrd, 2025 yil oxirida esa 23 mlrd kub metr bo‘lgan.

Qozog‘iston rasmiylari suv hajmining oshishini Orolni tiklash bo‘yicha 20 yildan ortiq davom etayotgan ishlar bilan izohlamoqda. Shu davrda Shimoliy Orol maydoni 36 foizga kengaygan, suv hajmi deyarli ikki baravar oshgan, minerallashuv darajasi esa ikki baravar kamaygan.

Suv hajmini barqaror saqlash maqsadida Qozog‘iston Suv resurslari va irrigatsiya vazirligi Sirdaryo orqali har yili kamida 2 mlrd kub metr suvni Shimoliy Orolga yo‘naltirishni rejalashtirmoqda. Shuningdek, Turkiston va Qizilo‘rda viloyatlarida irrigatsiya tizimlarini modernizatsiya qilish va avtomatlashtirish bo‘yicha 160 dan ortiq loyiha amalga oshirilishi ko‘zda tutilgan.