Amerikalik tadbirkor Ilon Mask 20-may kuni Braziliyaga tashrif buyurib, prezident Jair Bolsonaro bilan uchrashishni rejalashtirmoqda, deb xabar bermoqda Globo gazetasi.

Prezidentning rasmiy jadvalida bu uchrashuv haqida hech qanday e’lon yo‘q, ammo Bolsonaroning o‘zi xorijlik mehmonning ismini ko‘rsatmasdan turib, “bizning Amazonimizga yordam berish uchun keladigan dunyo miqyosida tan olingan juda muhim shaxs” bilan gaplashishni rejalashtirayotganini aytgan. 

Nashrning yozishicha, Maskning kelishi o‘tgan yilning noyabrida AQShning Ostin shahrida tadbirkor bilan uchrashgan Braziliya aloqa vaziri Fabio Faria o‘rtasidagi kelishuvlar natijasi bo‘lgan. Keyin amaldor Maskga tegishli SpaceX kompaniyasining Braziliya hukumati loyihalarida qishloq maktablarini internet aloqasi bilan ta’minlash va Amazon'ning ekvatorial tropik o‘rmonlarini saqlab qolish rejalarini e’lon qildi. Globo nashrining yozishicha, juma kuni bo‘lib o‘tadigan yig‘ilishda ushbu loyiha va Starlink texnologiyalaridan foydalanish haqida so‘z boradi.

Globo ta’kidlashicha, Maskning Braziliya hukumati a’zolari va biznes vakillari bilan kechki ovqati sir saqlanmoqda va u San-Paulu shtatidagi Fasano Boa Vista mehmonxonasida bo‘lib o‘tadi.

• Braziliya
• Ilon_Mask
• Prezident
• Tashrif