Markaziy bank boshqaruvi 2022-yil 21-apreldagi yig‘ilishda asosiy stavkani yillik 17 foiz darajasida o‘zgarishsiz qoldirish bo‘yicha qarori press-relizi eʼlon qilindi.
Mazkur hujjatda, shuningdek, ichki narxlar dinamikasi va inflyatsion kutilmalar haqida ham maʼlumotlar berilgan.

Unga ko‘ra, joriy yilning mart oyida inflyatsiya darajasi 1,5 foizni tashkil etib, yillik hisobda 10,5 foizgacha oshgan va ikki xonali son darajasiga qaytgan. Bazaviy inflyatsiya ko‘rsatkichi yillik 9,1 foizda shakllanib, uning umumiy inflyatsiyadagi hissasi 6,9 foiz bandgacha oshgan.

Markaziy bank taʼkidicha, narxlarning o‘suvchi dinamikasi, asosan, import inflyatsiyasi, tashqi bozorlarda asosiy oziq-ovqat mahsulotlari narxining o‘sishi bo‘yicha kutilmalar va anʼanaviy mavsumiy omillar bilan izohlanadi.

Aprel oyida narxlarning maʼlum darajada muvozanatlashuvi kuzatilayotgan bo‘lib, Markaziy bankning haftalik kuzatuvlari natijalariga ko‘ra, aprelning dastlabki 20 kunida ayrim asosiy isteʼmol tovarlari bo‘yicha narxlarning pasayishi va muvozanatlashishi kuzatildi.

Ikkinchi chorakda narxlar dinamikasida mavsumiy omillar hisobiga meva va sabzavotlar guruhining hissasi pasaytiruvchi bo‘lishi, tashqi omillar va tarkibiy o‘zgarishlar taʼsirida nooziq-ovqat tovarlari guruhining oshiruvchi hissasining kuchayib borishi kutilmoqda.

2022-yil mart oyi so‘rovlari natijalariga ko‘ra, aholining inflyatsion kutilmalari 15 foizni, tadbirkorlarniki – 15,4 foizni tashkil etdi. Valyuta almashuv kursining nisbatan muvozanatlashuvi va tarkibiy islohotlar taʼsirida kelgusida kutilmalarning pasayib borishi taxmin qilinmoqda.

Yil so‘ngigacha inflyatsiya dinamikasiga taklif omillarining (ishlab chiqarish, transport-logistika, xorijdan yetkazib berish, yoqilg‘i-energetika narxlari oshishi) taʼsiri talab omillariga nisbatan yuqoriroq bo‘lishi kutilmoqda.

Sanoat ishlab chiqaruvchi korxonalar o‘rtasida o‘tkazilgan so‘rov natijalariga ko‘ra joriy yilning mart oyida ham xomashyo (ish, xizmatlar) yetkazib berish muddatlarining uzayishi kuzatilmoqda (mart oyida yetkazib berish muddatlari indeksi fevral oyidagi 51,4 dan 47,5 gacha yomonlashgan).

• Asosiy stavka
• Inflyatsiya
• Markaziy bank