Instagram ijtimoiy tarmogʻi supermodel Bella Hadidning shaxsiy akkauntiga nisbatan cheklovlar kiritdi.

“Instagram sahifamga storis joylashimga imkon bermayapti va bu cheklov Falastin haqidagi postlarimdan keyin boʻldi deb oʻylayman. Falastin haqida biror narsa eʼlon qilsam, Instagram meni banga tushiryapti, profilimning qamrovi keskin pasaymoqda, millionlab obunachilar postlarimni ham, storislarimni ham koʻrishmayapti. Men kun boʻyi Falastin haqidagi ikkita muhim voqea hikoya qilingan storisni sahifaga joylashga harakat qildim, aynan mana shular sahifamga joylanmayapti”, deydi Bella.

Kelib chiqishi falastinlik boʻlgan (supermodellar Bella va Jiji Hadidlarning otasi falastinlik tadbirkor Muhammad Hadid hisoblanadi) model ushbu mamlakat fuqarolarini doimiy ravishda qoʻllab-quvvatlab keladi, 50 milliondan ortiq obunachisi boʻlgan sahifasiga Falastin haqida postlar joylashtiradi va mitinglarda doimiy ravishda ishtirok etadi.

Opa-singil Hadidlar Falastinni qoʻllab-quvvatlaganlari uchun AQSh hukumati tomonidan tanqidga ham duchor boʻlgan. Bellaning Isroil-Falastin mojarosi haqidagi postlari Isroil hukumatigacha yetib borgan va ular Twitterʼdagi rasmiy sahifalarida modelni antisemitizmda ayblab, Bella bu ishi uchun uyalishi kerakligi yozib qoldirishgan. Model esa bunga javob hech kimga yomonlik tilamasligini aytgan edi.

Maʼlumot uchun, Bella Hadid dunyodagi eng mashhur va badavlat modellardan biri hisoblanadi. U 2019-yilda sayyoradagi eng chiroyli ayol deb tan olingan.

• Falastin
• Instagram
• Shou-biznes
• mashhurlar