O‘zbekiston Respublikasi Vazirlar Mahkamasi “Jamoat transportini moliyalashtirishning yangi tizimini tashkil etish chora-tadbirlari to‘g‘risida” qaror qabul qildi.
Unga ko‘ra, jamoat transportini moliyalashtirishning yangi brutto-shartnoma (yo‘nalishlarda cheklangan tariflarda yo‘lovchi tashish xizmatlari uchun “bosib o‘tilgan yo‘l” va “sifat” mezonlaridan kelib chiqqan holda hisob-kitob qilishni nazarda tutuvchi vakolatli organ va tashuvchi o‘rtasida tuzilgan shartnoma) tizimi joriy etiladi.
Qoraqalpog‘iston Respublikasi Transport vazirligi, viloyatlar va Toshkent shahar transport boshqarmalari tomonidan yo‘nalishlar tashuvchilarga biriktirilishi, yo‘lovchilarni muntazam tashishni amalga oshiruvchi tashuvchilarga va bunday tashishlarni amalga oshiruvchilarga qo‘yiladigan talablar, majburiy shartlar hamda tashuvchining majburiyatlari va javobgarliligi, bajarilgan ish hajmi va tashuvchiga to‘lanadigan to‘lov miqdori tartibi nizomda belgilab qo‘yilgan.
Yo‘nalishlarni tashuvchilarga biriktirish bo‘yicha tender savdolari qonunchilik hujjatlarida belgilangan tartibda amalga oshiriladi.
Vakolatli organ tender o‘tkazilishidan kamida oltmish kalendar kun oldin tenderga chiqariladigan yo‘nalishlarni belgilaydi, ularning pasporti va talablarini ishlab chiqadi. Yo‘nalishlarning boshlang‘ich narxini shakllantiradi hamda iqtisodiyot va moliya organlari bilan kelishadi.
Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari yo‘nalishlarni tenderga chiqarish jadvallari tasdiqlanishini ta’minlaydi va ommaviy axborot vositalarida e’lon qiladi.
Yo‘nalishlarning yakuniy narxi yo‘nalish bo‘yicha o‘tkazilgan tender natijalariga ko‘ra tashuvchilar tomonidan taqdim etilgan eng yaxshi taklif asosida aniqlanadi va brutto-shartnomada ko‘rsatib o‘tiladi.
Tender g‘olibi ikki kun muddatda vakolatli organga – avtobuslarni avtomatlashtirilgan dispetcherlik xizmatiga ulash, shuningdek, ATTO operatoriga – avtobuslarga avtomatlashtirilgan to‘lov tizimi terminallarini (validatorlar) o‘rnatish uchun harakat tarkibi saqlanadigan avtosaroy yoki to‘xtash joyi manzilini ko‘rsatgan holda murojaat qiladi.
Vakolatli organ va ATTO operatori tender g‘olibi arizasi kelib tushgan kundan boshlab o‘n kun muddatda avtobuslarni avtomatlashtirilgan dispetcherlik xizmatiga ulanishi hamda validatorlar o‘rnatilishini bepul ta’minlaydi.
Vakolatli organlar yoki ularning qoshida tuzilgan tashkilot xodimlari yo‘lkira haqi to‘lanishi va tashish xizmatlari sifatini nazorat qiladi.
Tashuvchi tomonidan qatnovlarni ish jadvaliga mos ravishda boshlash-tugatish hamda oraliq bekatlarga kelish-ketish vaqtlariga rioya qilinishi, belgilangan harakat intervali va muntazamligi ta’minlanishi, shuningdek, haydovchi va avtobuslar uchun qo‘yilgan minimal talablar bajarilishi lozim bo‘ladi.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!