Italiya bosh vaziri Jorja Melonining xizmat vazifasini o‘tash chog‘ida olgan sovg‘alarini sotish rejasi tanlangan auksion uyining jinoiy tergovga jalb qilingani sababli kimoshdi savdosi boshlanmasdanoq bekor bo‘ldi. Sovg‘alar orasida qator davlatlar rahbarlari, jumladan, O‘zbekiston prezidenti bergan qimmatbaho toshli marjon ham bor.

Savdoni o‘tkazish uchun tanlangan “Bertolami Fine Art” auksion uyi arxeologik topilmalarning noqonuniy savdosiga oid uzoq muddatdan beri davom etayotgan surishtiruv doirasida tergov qilinmoqda. Italiya matbuotiga ko‘ra, mazkur ish yuzasidan kompaniyaning asoschisi va egasiga nisbatan faoliyatni vaqtincha cheklash chorasi qo‘llangan.

Italiya qonunchiligiga binoan, bosh vazir xorijiy davlat rahbarlaridan qabul qilgan va qiymati 300 yevrodan oshadigan sovg‘alarni shaxsiy mulki sifatida olib qolishi mumkin emas. Shu bois bunday buyumlarning aksariyati Kidji saroyidagi maxsus qo‘riqlanadigan xonada saqlanadi va keng jamoatchilikka namoyish etilmaydi.

“Meloniga berilgan sovg‘alar orasida uning 2025-yil may oyida O‘zbekistonga rasmiy tashrifi vaqtida Prezident Shavkat Mirziyoyev hadya qilgan olmos, oltin va sitrin kvars toshli marjon ham mavjud”, – deya yozmoqda Politico.

Bundan tashqari, sovg‘alar orasidan Slovakiya prezidenti Peter Pellegrinidan olingan bir quti zargarlik buyumlari hamda Vengriya bosh vaziri Viktor Orban bergan chinni idishlardan iborat serviz va olti shisha vino, AQShning sobiq prezidenti Jo Baydendan sopol idish, Ukraina prezidenti Volodimir Zelenskiydan planshet, shuningdek, Liviya va boshqa arab davlatlariga safarlar chog‘ida olingan 15 ta gilam bor.

Ta’kidlanishicha, bekor qilingan ushbu auksiondan qariyb 800 ming yevro mablag‘ yig‘ilishi, tushgan pulning asosiy qismi esa xayriya tashkilotlariga yo‘naltirilishi kutilgandi. Mablag‘ning kichikroq qismi auksion uyining xizmat haqini qoplash uchun mo‘ljallangandi.

• Bosh vazir
• Italiya
• Shavkat Mirziyoyev