Venesuela Prezidenti Nikolas Maduro va uning rafiqasi qo‘lga olinib, mamlakatdan olib chiqib ketildi. Bu haqda AQSh Prezidenti Donald Tramp o‘zining ijtimoiy tarmoqlardagi sahifasida yozdi.

“Prezident Nikolas Maduro va uning rafiqasi qo‘lga olinib, mamlakatdan olib ketilgan. Ushbu operatsiya AQSh huquqni muhofaza qilish organlari bilan hamkorlikda o‘tkazildi. Tafsilotlar keyinroq e’lon qilinadi”, deydi Tramp Truth Social tarmog‘ida. 

Maduro AQSh armiyasining “Delta” maxsus bo‘linmasi jangchilari tomonidan qo‘lga olingan. Bu haqda o‘z manbalariga tayanib, CBS telekanali jurnalisti Jennifer Jeykobs ma’lum qildi. 

“Manbalarimning xabar berishicha, Venesuela Prezidenti Nikolas Maduro AQSh Qurolli kuchlarining maxsus elita bo‘linmasi – Delta Force tomonidan qo‘lga olingan”, – deydi jurnalist.

Ma’lumot uchun, “Delta” – AQSh Mudofaa vazirligi tomonidan tashkil etilgan 1-maxsus operativ otryad bo‘lib, u 1970-yillarning oxirida tuzilgan. Ushbu bo‘linma AQShning deyarli barcha yirik harbiy amaliyotlarida ishtirok etgan.

1989-yilda “Delta” Panamada o‘tkazilgan operatsiyada qatnashgan. O‘shanda AQSh narkotrafikka qarshi kurash bahonasida Panama Prezidenti Manuel Noregani hokimiyatdan ag‘dargan.

• Prezident
• Venesuela