2025-yilda dunyoning turli hududlarida 128 nafar jurnalist va OAV xodimlari halok bo‘ldi, ular orasida 10 nafar ayol ham bor. Bu haqda Xalqaro jurnalistlar federatsiyasi (XJF) xabar berdi.

Ma’lum qilinishicha, ushbu statistikaga baxtsiz hodisa natijasida yuz bergan to‘qqizta o‘lim ham kiritilgan. “2024-yilga nisbatan o‘sish jurnalistlar uchun xavotir eng yuqori darajada ekanini anglatadi”, – deydi Xalqaro jurnalistlar federatsiyasi rahbari Entoni Bellanjer.

Tashkilot hokimiyatlarning “OAV xodimlarini himoya qilishdagi ojizligi”ni qoraladi va 2026-yilda “zo‘ravonlik va jazosizlik aylanmasiga barham berish uchun zudlik bilan qat’iy choralar ko‘rish”ga chaqirdi.

IFJ ma’lumotlariga ko‘ra, 2025-yilda jurnalistlar va OAVning boshqa xodimlarini o‘ldirish holatlari bilan jiddiy vaziyat Yaqin Sharq va arab mamlakatlarida kuzatilgan: barcha holatlarning 58 foizi shu mintaqada qayd etilgan. Jurnalistlar eng katta xavfga qurolli mojarolar ketayotgan hududlarda duch keladi. Xususan, 2025-yilda Yamanda — 13 jurnalist, Ukrainada — 8, Sudanda esa 6 jurnalist halok bo‘lgan.

Xalqaro jurnalistlar federatsiyasi 1990-yildan beri OAV xodimlari o‘limi bo‘yicha statistikani yuritib keladi va shu vaqtdan buyon jami 3173 ta jurnalist halok bo‘lgan. 2025-yil 31-dekabr holatiga ko‘ra, dunyo bo‘ylab 533 jurnalist qamoqda qolmoqda, ularning katta qismi (143 nafar) Xitoyda. Bir yil avval bu ko‘rsatkich 516 jurnalistni tashkil etgan.

• Dunyo bo‘ylab
• O'lim
• jurnalist
• statistika