Jizzax viloyati jinoyat ishlari bo‘yicha Zardor tuman sudida ichkilik iste’moli oqibatida sodir etilgan jinoyat ishi ko‘rib chiqildi. Sud materiallariga ko‘ra, voqea 2025-yil 13-iyul kuni soat 17:00 atrofida sodir bo‘lgan. 1980-yilda Sirdaryo viloyati Sirdaryo tumanida tug‘ilgan sudlanuvchi Jizzax viloyati Sharof Rashidov tumanida qurilish ishlarida birga ishlayotgan tanishi bilan spirtli ichimlik iste’mol qilgan. Shundan so‘ng ular o‘rtasida kelishmovchilik kelib chiqqan.

Mojaro davomida sudlanuvchi oshxona pichog‘i bilan tanishining qorin va ko‘krak sohalariga zarba berib, unga qasddan og‘ir tan jarohati yetkazgan. Sudlanuvchi sud majlisida aybiga iqror bo‘lib, qilgan ishidan pushaymon ekanini bildirgan va yengilroq jazo so‘ragan.

Sud jabrlanuvchi va guvohlarning ko‘rsatmalarini, shuningdek, ish hujjatlarini o‘rganib chiqib, sudlanuvchining to‘rt nafar farzandi borligi hamda mavsumiy ishchi ekanini inobatga olgan. Natijada sud hukmi bilan u uch yil muddatga ozodlikdan mahrum qilish jazosiga hukm qilindi. Jazo umumiy tartibdagi koloniyada o‘talishi belgilandi.

• Jinoyat
• Jizzax
• Pichoq
• qurilish