“Oʻzbekkosmos” agentligi va uning tizimidagi “Kosmik monitoring va geoaxborot texnologiyalari markazi” mutaxassislari tomonidan favqulodda vaziyatlar sohasida respublikaning yongʻinlar yuzaga kelishi mumkin boʻlgan hududlarida, yongʻinlarni dastlabki bosqichlarda kosmik monitoring orqali aniqlashni yoʻlga qoʻyishga yordam beruvchi, har bir termal nuqtani koʻrsatib turadigan interaktiv geoaxborot tizimi joriy etildi. Ushbu tizim kosmik maʼlumotlarni muntazam ravishda yangilash, yangi termal nuqtalarni aniqlash, ularni harorat koʻrsatkichlari, vaqti va boshqa zarur boʻlgan maʼlumotlar asosida yongʻin sodir boʻlishi mumkin boʻlgan hududlar va sodir boʻlayotgan yongʻinlarni barvaqt aniqlash imkonini beradi. Bu haqida “Oʻzbekkosmos” agentligi matbuot xizmati xabar berdi.

Platforma taqdimoti Favqulodda vaziyatlar vazirligi binosida boʻlib oʻtdi. Unda soha mutaxassislari tizimning imkoniyatlari, undan foydalanish koʻrsatmalari, maʼlumotlarning yangilanib borilish vaqtlari va boshqa imkoniyatlari bilan batafsil tanishtirildi.

Shuni alohida taʼkidlab oʻtish kerakki, interaktiv geoaxborot tizimi termal nuqtalarni aniqlash orqali favqulodda vaziyatlarga tezkorlik bilan javob berish va oldini olish imkonini beruvchi koʻmakchi platforma hisoblanadi.

• O‘zbekkosmos
• ilm-fan
• kosmos