Bugun dunyoda Butunjahon talabalar kuni nishonlanadi. Shuningdek, aynan mana shu sanada mashhur Suvaysh kanali ochilgan, koronavirus ilk marta rasman qayd etilgan.
Butunjahon talabalar kuni
17 noyabr sanasini Talabalar kuni deb eʼlon qilish taklifi 1946 yili butunjahon talabalar kongressida tasdiqlangan. Talabalar ushbu bayramni xursandchilik bilan nishonlashadi, ammo unga bogʻliq fojia haqida koʻpchilik bilmaydi. 1939 yilning 28 oktyabr kuni Chexoslovakiyaning Praga shahrida talabalar oʻqituvchilari bilan birga Chexoslovakiyaning taʼlim bayramini nishonlash uchun namoyishga chiqadilar. Ularni tarqatib yuborishadi, ammo toʻpolon vaqtida tibbiyot fakultetida tahsil oluvchi talaba Yan Opletal otib oʻldiriladi. 1939 yilning 15 noyabr kuni talabaning dafn marosimi boʻlib oʻtadi va marosim norozilik namoyishiga aylanib ketadi. 17 noyabr kuni talabalar yotoqxonasi oʻrab olinadi, 1200 nafardan ortiq talaba qoʻlga olinadi va Zaksenxauzen konslageriga olib ketiladi. Talabalarning toʻqqiz nafari Ruzine tumanida joylashgan qamoqxonada sudsiz qatl etiladi. Chexiyadagi barcha oliy oʻquv yurtlari urushning oxiriga qadar yopib qoʻyiladi. Talabalar kunini taʼsis etishga mana shu voqea asos boʻlgan.
Suvaysh kanali ochilgan kun
1869 yilning 17 noyabr sanasida Oʻrtayer dengizini Qizil dengiz bilan bogʻlovchi Suvaysh kanali ochiladi. Bu orqali dengizchilarning butun Afrikani aylanib kelishlariga hojat qolmaydi, ularning yoʻli 8 ming kilometrga qisqaradi. Kanalning ochilishi munosabati katta bayram uyushtiriladi. Tantana 7 kun davom etadi va ushbu bazm Misr sultoniga 28 million oltin frankka tushadi.
COVID-19 virusi ilk bor qayd etilgan kun
COVID-19 virusi 2019 yilning dekabr oyida Xitoyning Uxan shahrida avj oldi. Ammo, u ilk marta noyabr oyining 17-sanasida qayd etilgan edi. Xubey hududida yashovchi 55 yoshli fuqaro koronavirusga chalingan birinchi odam hisoblanadi. U 17 noyabr kuni shifokorga murojaat qilgan, shundan keyin har kuni bemorlar soni koʻpayib boravergan. Dekabr oyining oʻrtalarida ularning soni 30 taga yaqinlashib qolgan, 20 dekabr kuni esa koronavirusga chalingan bemorlar soni 60 dan oshgan edi.
2020 yilning 30 yanvar kuni JSST koronavirus epidemiyasi tufayli sogʻliqni saqlash sohasida favqulodda holat eʼlon qiladi. 2020 yilning 11 mart sanasida esa pandemiya rasman tan olinadi.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!