Beloruslik xonanda va bastakor Maks Korjning Rossiya, Belorus va Oʻzbekistonda oʻtkazilishi kerak boʻlgan konsert dasturlari bekor qilindi. Ijodkor oʻzining Instagram sahifasida buning sababini ochiqladi.

“Tushunganingizdek, bu yili mamlakatlarimizda konsertlar boʻlmaydi. Har kuni hayotlarga nuqta qoʻyilayotgan bir vaqtda baxtli va tashvishsiz hayot haqida kuylay olmayman. Oʻzingizni ehtiyot qiling. Hammasi yaxshi boʻladi”, deb yozdi Korj.

Aksariyat muxlislar Korjning Rossiya va Belorusdagi konsertlarda chiqish qilishdan bosh tortishiga Ukrainadagi harbiy harakatlar sabab boʻlganini taxmin qilganlar. Ijodkor Rossiyaning Ukrainadagi harbiy harakatlari boshlangan ilk kunlarda ushbu operatsiyani “mustaqil mamlakat hududiga bostirib kirish” deya atagan va Ukrainani qoʻllab-quvvatlashini maʼlum qilgandi. Bir necha kun avval esa uning Ukrainadagi urush haqida kuylangan “Oʻz uyim” nomli qoʻshigʻi taqdim etilgan.

Ijodkorning Oʻzbekistondagi konserti 18-iyun kuniga rejalashtirilgan edi.

• Shou-biznes
• konsert
• mashhurlar