Marsga “Curiosity” missiyasi uchun mas’ul bo‘lgan NASA jamoasi rover tomonidan noodatiy kulrang tosh suratga olinganini e’lon qildi. U atrof-muhit fonida ajralib turadi va katta ehtimol bilan bu yerga osmondan uchib tushgan bo‘lishi mumkin.

“Bu Sharp tog‘i ustidagi toshli materiallarning qoldiqlari yoki hatto meteorit bo‘lishi mumkin bo‘lgan noodatiy kulrang tosh”, – deydi sayyora geologi Ketrin O’Konnell-Kuper.

Qayd etilishicha, “Curiosity” suratidagi tosh Marsda topilgan avvalgi meteoritlarga juda o‘xshaydi. Bu sayyora koinotda mavjud ulkan toshlar tomonidan “bombardimon” qilingan uzoq tarixga ega, shuning uchun topilmaning o‘zi olimlar uchun ajablanarli emas.

Yana bir savol shundaki, koinotdagi bunday toshlar chuqur o‘rganishni talab qiladi, biroq bu ish hali ham amalga oshirilmagan. Olimlarni Mars atrof-muhitining ta’siri temir meteoritlarga qanday ta’sir qilishi va bu meteoritlarning Yerda sodir bo‘lgan tajribasi bilan qanday solishtirish haqidagi ma’lumotlar ko‘proq qiziqtiradi.

Qayd etish mumkin, “Curiosity” NASA’ning “Mars Science Laboratory (MSL)” missiyasi doirasida sayyoradagi “Geyl” kraterini tadqiq qilish uchun mo‘ljallangan uchinchi avlod roveri hisoblanadi. U o‘zidan avvalgi “Spirit” va “Opportunity” roverlaridan bir necha barobar kattaroq va og‘irroq bo‘lgan mustaqil kimyo laboratoriyasidir.

“Curiosity” 2011-yil 26-noyabr kuni Kanaveral burnidan uchirilgan va 2012-yil 6-avgust kuni Marsdagi Geyl krateri ichidagi “Ayeolis Palus”ga qo‘ngan. 2012-yil dekabr oyida “Curiosity”ning ikki yillik missiyasi cheksiz muddatga uzaytirilgan.

• Mars
• NASA