Dunyoning qator davlatlarida tarqalayotgan maymun chechagi infeksiyasi va uning O‘zbekistonda tarqalganlik holati yuzasidan mutaxassis, tibbiyot fanlari doktori, professor Nurmat Otabekov maʼlumot berdi.

Otabekovga ko‘ra, Jahon sog‘liqni saqlash tashkiloti kasallik hozirgacha 14 ta davlatda qayd etilganini tasdiqlagan. Xususan, infeksiyani yuqtirganlar soni 90 nafarga yaqinlashgani aytilyapti. Qolaversa, qariyb 30 kishi kasallikka chalinganlikda gumonlanmoqda. Qolaversa, shu kungacha o‘lim holatlari ro‘yxatga olinmadi.

– Aslida, bu xastalik kecha yoki bugun paydo bo‘lgani yo‘q. Yaʼni ilk bor u bundan 52 yil avval Kongo davlatida aniqlangan. Kasallikning alohida holatlari Markaziy va G‘arbiy Afrika mamlakatlarida kuzatilgan.

Bizdagi maʼlumotlarga ko‘ra, maymun chechagi deyarli barcha holatlarda hayvonlardan odamga yuqadi. Asosan endemik hududlarga safar qilgan va jonivorlar bilan muloqotda bo‘lgan kishilarda tasdiqlanishi mumkin”, – deydi Otabekov.

Qayd etilishicha, dunyo bo‘ylab kasallikning qayta avj olishi 7-may sanasidan boshlandi. Shu kuni Buyuk Britaniyaga Nigeriyadan qaytgan sayyohda mazkur infeksiya aniqlandi. Unda kasallik belgilari terida toshmalar toshishi bilan namoyon bo‘lgan. Shundan so‘ng ushbu mamlakatda o‘nga yaqin bemorlar maymun chechagiga chalingani maʼlum bo‘ldi.

Keyinroq AQSh, Kanada, Ispaniya, Portugaliya, Fransiya, Italiya, Shvetsiya, Belgiya, Niderlandiya, Gretsiya, Avstraliya, Isroil va Shveysariyada ham xastalik tarqala boshlagan.

Tahlillarga ko‘ra, kasallik odatda yengil kechyapti va bemorlarning ko‘pchiligi bir necha hafta ichida tuzalib ketmoqda.

Shunga qaramay, hozir JSST maymun infeksiyasi keng tarqalib ketmasligi uchun dunyo mamlakatlarini profilaktik choralarni kuchaytirishga chaqirmoqda.

Nurmat Otabekov, shuningdek, bu kasallikdan qanday himoyalanish mumkinligi to‘g‘risida ham to‘xtalib o‘tdi.

Mutaxassis fikricha, aynan maymun chechagiga qarshi emlash preparatlari mavjud bo‘lmasa-da, bir qator mamlakatlar oddiy chechakka qarshi vaksinalar orqali buning oldini olishga harakat qilmoqda.

Chunki ikki virus bir-biriga o‘xshash va shu tufayli bunday vaksinalar maymun chechagining oldini olishda taxminan 85 foizga samara berishi kutilyapti.

“O‘zbekistonda hozirga qadar maymun chechagi qayd etilgani yo‘q. Ayni paytda JSST tavsiyalaridan kelib chiqib bu infeksiyaning yurtimizga kirib kelmasligi uchun zarur choralarni ko‘ryapmiz”, – deydi “Sanepidem” xizmati boshlig‘i o‘rinbosari Nurmat Otabekov.

• Infeksiya
• Maymun chechagi