Kecha taniqli xonanda Nargiz Zokirovaning Rossiya hududiga kiritilmagani va “Domodedovo” aeroportida qoʻlga olingani haqida xabar bergan edik. Ijodkorning advokati Bahrom Ismoilov Nargiz Zokirovaning Moskva aeroportidan Oʻzbekistonga qaytib ketishga majbur boʻlganini maʼlum qildi.

“Endilikda 51 yoshli xonanda Rossiya Federatsiyasi hududiga 2072-yilga qadar kira olmaydi. Qoʻlimda uning Rossiyaga kirishini 50 yilga taqiqlovchi hujjat turibdi. Bu Rossiyaning maxsus operatsiyasini tanqid qilgan mashhur shaxslarga nisbatan eʼlon qilinayotgan taqiq. Nargiz Zokirovaga nisbatan ham mana shunday cheklov kiritildi. Nargiz bunga tayyor edi. U oʻziga nisbatan mana shunday chora koʻrilishini taxmin qilgandi. Shunga qaramasdan, himoyamdagi shaxs oʻzining fuqarolik pozitsiyasiga sodiq qoladi”, dedi advokat.

Bahrom Ismoilov Nargiz Zokirovaga nisbatan jinoyat ishi qoʻzgʻatilmasligi, uning aytgan gaplari ijodkorning shaxsiy fikrini ifodalashini taʼkidlab oʻtgan.

• Rossiya
• San’at
• Shou-biznes
• mashhurlar