NASAning “Orion” kosmik kemasi Oyga parvozining 26-kunida Yerga qaytib keldi. Qoʻnish kapsulasi Tinch okeanining Guadalupe oroli yaqinidagi qismiga kelib tushgan.

Kosmik kema Yer atmosferasiga kirgan vaqtida kapsula “Orion”ning asosiy modulidan ajralib chiqqan. Qurilmani qoʻnish manzilida AQSh HDKning “Portlend” desant kemasi kutib olgan.

“Orion” kemasi parvoz mobaynida Oy atrofidan ikki marta – 21-noyabr va 5-dekabr kunlari uchib oʻtgan, uning yuzasiga 130 kilometrgacha yaqinlashgan.

Kemaning joriy parvozi uchuvchilarsiz amalga oshirilgan, astronavtlarni “Orion” bortida Oyga uchirish 2024-yilning oxirlariga rejalashtirilgan. Shu tariqa dastur doirasida 2025-2026-yilga kelib odamlarni Oyga chiqarish nazarda tutilgan.

Eslatib oʻtamiz, insoniyat oxirgi marta Oyga bundan 50 yil avval borgan. Bu Amerikaning “Appolon-17” kemasi ekipaji aʼzolari edi.

NASAning Oyni zabt etishga qaratilgan yangi loyihasiga “Artemida” deya nom berilgan boʻlib, Artemida qadimgi yunon mifologiyasida iloh Appolonning singlisi boʻlgan.

• Koinot
• NASA
• ilm-fan
• kosmos
• xabar