Bosh prokuratura huzuridagi Departamentning Xatirchi tuman bo‘limi tomonidan o‘tkazilgan tergovga qadar tekshiruvda, tumandagi ko‘mir omborida o‘zlashtirish yoki rastrata yo‘li bilan talon-toroj qilish jinoyati sodir etilganlik holati aniqlandi.

Maʼlum qilinishicha, joriy yil 3 noyabr holatiga “Ko‘mirtaʼminot” MChJning Xatirchi ko‘mir omborida ko‘mir mahsulotini qoldig‘ini aniqlash yuzasidan o‘tkazilgan marksheyderlik o‘lchovida, ombor mudiri A.A. va boshqalar tuman aholisi uchun imtiyozli narxlarda sotilishi lozim bo‘lgan o‘zlarining moddiy javobgarligidagi 216,9 mln so‘mlik “BR” markali 722,4 tonna ko‘mir kamomadiga yo‘l qo‘yganliklari aniqlangan.

Mazkur holat yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) bilan jinoyat ishi qo‘zg‘atilib, tergov harakatlari o‘tkazilmoqda.

• Jinoyat
• Navoiy