Bugun, 21-dekabr kuni Toshkent shahrida bo‘lib o‘tayotgan “Toshkent yoshlar forumi–2021” doirasida Ayollar forumi bo‘lib o‘tmoqda.

Unda qator spikerlar qatnashishi va ularning jamiyatda xotin-qizlar o‘rni haqida ma’ruza o‘qishlari rejalashtirilgan.

Forum doirasida so‘z olgan dastlabki spiker bir muddat oldin Nizomiy nomidagi Pedagogika universitetida sodir bo‘lgan “zamdekan mashmashasi”da asosiy ishtirokchilaridan biri Mushtariy Kamilovaga so‘z berdi.

Mushtariy Kamilova o‘z chiqishida mazkur voqeaga keng to‘xtalib, o‘z orzulariga yetishishida bu voqea to‘g‘anoq bo‘lganini aytadi. U shuningdek, ayni paytda tergov ishlari tugamagan jinoyat ishi doirasida ayblovni to‘liq ikkinchi tomon (Pedagogika universiteti dekan o‘rinbosari, -tahr.)ning zimmasiga yuklaydi.

“Do‘stlarim, sevimli ishim, o‘qishim va kelajak uchun katta rejalarim bor edi. Lekin 2021-yilning 18-oktyabr kuni sanoqli soniyalarda hammasini yo‘qotdim.

Mening orzularim va xayotimni o‘g‘irlagan inson ismi — Yuldashbek Bog‘abayev. Mening universitetimda dekan o‘rinbosari lavozimida ishlagan, mening nomusimga tegishga harakat qilib, so‘ng derazadan uloqtirdi. O‘sha paytda biron suyagim omon qolmagan deb o‘yladim, og‘riq shu qadar kuchli edi. Ba’zan, hozir uyg‘onaman-u, barchasi oddiy tush ekanligi bo‘lib chiqadiganday tuyuladi”, – deydi u.

Xabardor.uz IIV Matbuot kotibi Sh.Gʻiyosovdan mazkur jinoyat ishining tugallangan yoki tugallanmagani yuzasidan javob oldi va unga ko‘ra, ayni paytda “materiallar sudga berilishi kutilyapti. Bunday ishlar odatda yopiq ko‘riladi (yopiq sud majlislarida, -tahr.).”

Tahririyatning, mazkur jinoyat ishini sodir bo‘lgan kunidan boshlab kuzatib kelayotgan sababli, Mushtariy Kamilovaning bugungi chiqishi yuzasida hamda uni forumda ishtirok etishini xohlagan tashkilotlarga qator savollari paydo bo‘ldi.

– Bu holatda Yuldashbek Bog‘abayevga nisbatan aybsizlik prezumpsiyasi prinsipi buzilmayaptimi?

– Nega sud hukmidan avval “zamdekan”ga nisbatan ayblov ikkinchi tomon tilidan ommaga singdirilyapti yoki hukm allaqachon tayyormi?!

– Tashkilotchilar mamlakatda ayollar huquqlarini tiklash uchun “jabrdiydalar”ni topishdi nega no‘noqlik qilishdi yoki respublikada haqiqatda jabr ko‘rgan xotin-qizlar kammi?

Ma’lumot uchun:

Jinoyat sodir etganlikda ayblanayotgan har bir shaxsning ishi sudda qonuniy tartibda, oshkora ko‘rib chiqilib, uning aybi aniqlanmaguncha u aybdor hisoblanmaydi. (Konstitutsiya 26-modda)

Gumon qilinuvchi, ayblanuvchi yoki sudlanuvchi uning jinoyat sodir etishda aybdorligi qonunda nazarda tutilgan tartibda isbotlangunga va qonuniy kuchga kirgan sud hukmi bilan aniqlangunga qadar aybsiz hisoblanadi. (Jinoyat kodeksi 23 modda)

Bundan tashqari, JPKning 84,  454-moddalari, O‘zbekiston Respublikasi "Sudlar to‘g‘risida"gi Qonuni 16-moddasining ikkinchi qismi, Oliy sud Plenumining 2014-yil 23-maydagi 07-sonli "Sud hukmi to‘g‘risida"gi qarori 1-bandining ikkinchi xatboshisi, Oliy sud Plenumining 2003-yil 19-dekabrdagi 17-sonli "Gumon qilinuvchi va ayblanuvchini himoya huquqi bilan ta’minlashga oid qonunlarni qo‘llash bo‘yicha sud amaliyoti to‘g‘risida"gi qarori 5-bandining birinchi xatboshisida ham aybsizlik prezumpsiyasiga oid tartiblar belgilangan.

• IIBB
• Jinoyat
• Toshkent