Finlyandiyaning Nokia kompaniyasi Rossiyani tark etishga qaror qildi. Bu haqda kompaniyaning rasmiy bayonotida aytiladi.

Qayd etilishicha, bunday qaror Rossiya Ukrainada maxsus operatsiya o‘tkazganidan keyin qabul qilingan.

“O‘tgan haftalarda biz yetkazib berishni to‘xtatdik, yangi biznesni va cheklangan ilmiy-tadqiqot faoliyatimizni Rossiyadan tashqariga ko‘chirmoqdamiz”, deyiladi bayonotda.

Kompaniyaning bosh ijrochi direktori Pekka Lundmark Reuters agentligiga kompaniya “hozirgi sharoitda mamlakatda biznesni davom ettirishning hech qanday usulini ko‘rmasligini” aytgan. 

Kompaniya chiqish jarayoni tugaguniga qadar mijozlarni qo‘llab-quvvatlashda davom etadi, deya qo‘shimcha qildi Lundmark. 

Ma’lumot uchun, Nokia korporatsiyasi mobil, keng polosali va IP tarmoqlari uchun telekommunikatsiya uskunalarini ishlab chiqaradi. Nokia brendi ostidagi telefonlar va planshetlar Finlyandiyaning HMD kompaniyasiga tegishli. 2014-yilda Nokia telefonlarini ishlab chiqarish Microsoft korporatsiyasiga sotilgan, ammo 2016-yilda HMD u bilan shug‘ullana boshlagan.

Kompaniya ma’lumotlariga ko‘ra, 2021-yilda savdolarning 2 foizi Rossiya hissasiga to‘g‘ri kelgan. Nokia kompaniyadan chiqish qarori uning bu yilgi moliyaviy istiqboliga ta’sir qilishini kutmaydi.

• Jahon
• Nokia
• Rossiya
• texnologiya