31°
Kechasi 18°
Donald Tramp Ukraina yetakchisi Vladimir Zelenskiy bilan telefon orqali muloqot qildi. Tramp Putin bilan suhbatdan so‘ng navbatdagi qadamlar qanday bo‘lishni muhokama qilgan.
The New York Times nashri xabar berishicha, AQSH prezidenti Donald Tramp chorshanba kuni Ukraina prezidenti Vladimir Zelenskiy bilan telefon orqali mazmunli suhbat o‘tkazgan va unda Rossiya prezidenti Vladimir Putin bilan muhokamalardan so‘ng keyingi qadamlar muhokama qilingan.
Tramp ijtimoiy tarmoqdagi bayonotida telefon orqali suhbat bir soat davom etganini va Davlat kotibi Marko Rubio hamda Milliy xavfsizlik maslahatchisi Maykl Uols yaqin orada suhbat tafsilotlarini batafsil bayon qilishini bildirgan.
“Muhokamaning asosiy qismi kecha Putin bilan bo‘lib o‘tgan suhbatga asoslandi, Rossiya va Ukrainaning talab hamda ehtiyojlarini uyg‘unlashtirish masalasi ko‘rib chiqildi”, — deydi Tramp.
Putin suhbat chog‘ida Ukrainaga qarshi hujumlarning bir qismini to‘xtatish bo‘yicha qisman kelishuvni taklif qilgan edi. Bu kelishuv Kiyev Vashingtonning talabiga ko‘ra rozi bo‘lgan 30 kunlik shartsiz sulhdan kamroqni nazarda tutardi.
Chorshanba kuni Zelenskiy qisman otashkesim o‘rnatish taklifiga ma’lum darajada ochiq munosabat bildirdi, biroq bunday kelishuv samarali bo‘lishi uchun AQSH tomonidan nazorat qilinishi kerakligini ta’kidladi.
“Ukraina himoya qilinishi kerak bo‘lgan obyektlar ro‘yxatini tayyorlaydi, agar nazorat mexanizmi Rossiya bizning obyektlarimizga zarba bermayotganini tasdiqlasa, biz ham ularnikiga zarba bermaymiz”, — deydi Zelenskiy Finlyandiya prezidenti Aleksandr Stubb bilan Xelsinkidagi matbuot anjumanida.
Zelenskiy Putin tomonidan taklif etilgan keng qamrovli sulh shartlarini, jumladan, Ukrainaga chet el harbiy va razvedka yordamini to‘liq to‘xtatish talabini — Rossiyaning muzokaralarda ko‘proq vaqt yutish va frontda o‘z pozitsiyalarini yaxshilashga urinishi sifatida baholadi.
Putin va Tramp o‘rtasidagi suhbatdan so‘ng Zelenskiy yana shu fikrni takrorladi va Rossiya shartlar qo‘yish orqali urushni tugatish niyati yo‘qligini ko‘rsatayotganini aytdi.
Zelenskiy 28-fevral kuni Oq uyda bo‘lib o‘tgan muammoli uchrashuvdan so‘ng Vashington bilan muvozanatli munosabatlarni saqlashga harakat qilmoqda. O‘sha paytda Tramp va vitse-prezident Jey Di Vens uni AQSH yordami uchun “yetarli darajada minnatdorlik bildirmayotganlikda” ayblagan edi. Uchrashuvdan keyin Tramp ma’muriyati Ukrainaga harbiy yordam va razvedka ma’lumotlarini vaqtincha to‘xtatdi. Buning ortidan Zelenskiy ikki davlat o‘rtasidagi munosabatlarni yaxshilashga harakat qildi.
Yevropa ittifoqidagi davlatlar har qanday sulh harakatlarini ehtiyotkorlik bilan qo‘llab-quvvatlayotgan bir paytda Kiyevga ko‘proq yordam berishga va Rossiyaga bosimni kuchaytirishga va’da berishmoqda.
Ukraina rasmiylari AQSH va Saudiya Arabistonidagi muzokaralardan so‘ng 30 kunlik o‘t ochishni to‘xtatish kelishuvini qabul qilishgan edi. Bu shartnoma quruqlik, havo va dengizdagi hujumlarni qamrab olgan bo‘lib, Rossiyaning uch yil oldingi keng ko‘lamli bosqinidan beri birinchi marta to‘liq sulh e’lon qilinishi mumkin edi. Zelenskiyning ta’kidlashicha, ushbu bir oylik sulh uzoq muddatli tinchlik bo‘yicha kengroq muzokaralar uchun imkoniyat yaratishi kerak edi.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
