“O‘zbekistonda ekologik nosoz deb topilgan mashinalar haydovchilariga chora ko‘riladi”, – deb xabar bermoqda Ekologiya vazirligi axborot xizmati.

Xabarga ko‘ra, Ekologiya, atrof-muhitni muhofaza qilish va iqlim o‘zgarishi vazirligi hamda Ichki ishlar vazirligi bilan hamkorlikda Qoraqalpog‘iston Respublikasi, viloyatlar markazlari va Toshkent shahrida navbatdagi “Toza havo” oyligi o‘tkaziladi.

Tadbir “Atmosfera havosini muhofaza qilish to‘g‘risida”gi hamda “Ekologik nazorat to‘g‘risida”gi qonunlari ijrosini ta’minlash, foydalanishda bo‘lgan avtotransport vositalarining ekologik holatini nazorat qilish maqsadida ikki bosqichda tashkil etiladi.

Birinchi bosqich 10-aprel – 10-may, ikkinchi bosqich esa 10-avgust – 10-sentyabr oralig‘ida bo‘lib o‘tadi. (Toshkent shahrida 10-sentyabr—10-oktyabr).

“Toza havo” oyligi davomida muntazam YPX maskanlarida, majburiy texnik ko‘rikdan o‘tkazishda hamda ko‘chalarda harakatlanayotgan avtotransport vositalari tekshiriladi. Ekologik nosoz deb topilgan avtotransport vositalari haydovchilariga nisbatan Ma’muriy javobgarlik to‘g‘risidagi Kodeksning 87- va 125-moddalariga ko‘ra choralar ko‘riladi.

Shuningdek, “Atmosfera havosini muhofaza qilish to‘g‘risida”gi qonunning 13-moddasiga asosan, avtotransport vositalaridan nosozligi bartaraf etilgunga qadar foydalanish taqiqlanadi.

• Avtotransport
• Ekologiya
• YPX
• tekshiruv