Donald Tramp ma’muriyati tomonidan yangi bojlar joriy etilishi Apple aksiyalarining tushishiga va bir vaqtning o‘zida iPhone’ga bo‘lgan talabning keskin oshishiga sabab bo‘ldi. Xaridorlar Apple mahsulotlari ishlab chiqariladigan Xitoy tovarlariga 54 foizlik boj joriy etilishi ortidan narxlar keskin ko‘tarilishidan xavotirlanib, kompaniya mahsulotlarini ko‘p xarid qilmoqda.

Bloomberg'ning yozishicha, AQShdagi Apple xodimlari o‘tgan dam olish kunlari mijozlar soni keskin oshganini tasdiqlagan. Deyarli har bir xaridor “iPhone narxi yaqin kunlarda oshadimi”, – deb so‘ragan. Yangi modellarning savdosi boshlangan paytlardagidek navbatlar bo‘lmagan bo‘lsa-da, muhit tarang bo‘lgan. Tashvishga tushgan xaridorlar Apple qurilmalarini ommaviy ravishda sotib olgan, oqibatda kompaniyaning shu hafta oxiridagi daromadi so‘nggi yillardagi ko‘rsatgichdan ancha yuqori bo‘lgan.

Ma’lumot uchun, atigi ikki kun ichida Apple’ning kapitalizatsiyasi yarim trillion dollarga kamaygan, aksiyalari esa 2001-yildan beri eng katta pasayishni boshdan kechirgan. Kompaniya esa zarbani yumshatish uchun harakat qilmoqda – ishlab chiqarish zaxiralarini oshirmoqda va ishlab chiqarishning bir qismini Xitoydan Hindiston va Vyetnamga ko‘chirmoqda. Bu yerda bojlar Xitoydan pastroq.

iPhone narxi sezilarli darajada oshishi kutilmoqda, ammo Apple bu borada yetkazib beruvchilarga bosim o‘tkazib, o‘z foydasidan voz kechishi evaziga narxlarni saqlab qolishga harakat qiladi.

• AQSh
• Davlat boji
• Tramp
• iPhone
• savdo